Ben Arnoza
Usa siya sa akong mga sinaligan ug higala sa mga pundok sa mga lay ministers parokya ni Santiago Apostol sa Sogod. Kauban siya ni Brod. Paking Comahig nga dili gyud bation og kakapoy diha sa pagpangalagad. Subo palandongon karong tuiga si Brod Paking nga ilang presidente namatay ug maoy niuna si Bro. Ben Arnoza nisunod pud niya karon lang gyung buwana.
Dili ikalimod nga panahon sa mga kalaay sa among mga meetings kaniadto kini si Brod Ben maoy tigpakatawa.
Gani panahon sa mga salida sa parokya mopasundayag gyud kini siya.
Lingaw gyud mga tawo. Ug labaw sa tanan siya ang mapailubong solugoon ug andam mosakripisyo makahatud lang sa mga gikinahanglang serbisyo ngadto sa mga tawo gikan sa Kasaulogan sa Pulong hangtud na sa paghatag og recollection. Apan gumikan sa balatian sa kidney, wala na si Brod Ben.
Akong gipaambit kining maong tawo kay ning panahon sa pandemiya mahinungdanon kaayo nga atong batonan ang mga hiyas sa pagkamalipayon ug pagkamakugihon ning panahon sa dakong kalisud.
Ang pagkamalipayon mahinungdanon kaayo labina kun diha sa natad sa pakigbatok sa mga suliran sa atong kinabuhi.
Dili baya lalim ang mamahimong boryong. Malisod baya ang pakigbatok sa kalaay karon ug labaw na nga malisod kaayo karon ang pagpakig asdang sa pagkawalay buhat ning panahon diin bisan ang paghawok ug paggakos usa naman ka dakong sala kun maghisgot kita og pagpakita sa atong gugma.
Kun hain ka man karon Brod Ben padayon sa imong panaw. Ug sayud ko nga ang Dios usab mahimuot sa imong mga pasiaw. Iampo lamang kami kun asa ka man karon.
Ug hinumdomi nga dili gyud namo hikalimtan ang imong pagkamakugihon. Salamat sa panaghigala, salamat sa panahon, salamat usab sa imong kamanggihatagon.
Anugon lamang kay wala gyud ka makaabot sa piyesta ni Santiago Apostol.
Anugon kaysa akong pagmisa novena dili na gyud nuon kita magkakita. Ayo ayo sa imong panaw padulong sa kinabuhing dayon!
Pagtulon-an: lisod makalimtan ang usa ka higala mao nga samtang kuyog pa nimo sila hatagi gyud sila sa imong tinud-anay nga pagtimbaya.
- Latest