Granular lockdown

Ang kagamhanan mopatuman og “granular lockdown” sa 21 ka barangay dinhi sa Dakbayan sa Sugbo nga adunay labing daghang kaso sa Coronavirus Disease.

Daghan ang gipangulbaan kay wa man kaayo sila makasabot kon unsa ang kahulogan sa gitawag og granular lockdown. Pananglit ang inyong mga sitio way daghang COVID-19 cases, ayaw kahadlok.

Ang gipasabot sa granular lockdown nga kadto ra’ng mga sitio nga daghan kaayo og mga nagpuyo nga natakboyan sa coronavirus maoy ipahimutang og granular lockdown.

Pananglit sa Barangay Luz, ang COVID-19 anaa ra miigo sa Sitio Zapatera, aw ang maong sitio mao ra ang ibutang sa granular lockdown ug dili iapil ang uban nga way mga kaso sa COVID-19.

Kon ang usa ka dapit ibutang na sa granular lockdown, ang kagamhanan mohatag og tabang sa mga hingtungdang lumolupyo nga dili na pagawason gikan sa sitio. Unya, kadtong gustong mosulod sa maong sitio, did-an na sab aron nga dili sila matakdan. Unya, ang mga nagpuyo sa maong sitio nga gipahimutang sa granular lockdown, dili usab pagawasgawason sa ilang kabalayan.

Aron pagsiguro nga mapatuman gyud ang mga health protocols, gikauyonan sa Inter-agency Task Force on COVID-19, nga destinohan og daghang polis ug militar ang maong mga sitio. Nasabtan na ba ninyo?

* * *

Ang tinuod mga friends, napul-an na ko pagkuha og mga statistics bahin sa COVID-19 positives. Nasabot nako nga bisan unsaon pa nimo og sulti nga misaka na ang gidaghanon sa mga natakboyan og COVID-19, daghan ang dili magtagad.

Gani may nadunggan ko nga adunay uban nga gusto pa nga sila matakdan og coronavirus, aron nga kon maayo kuno sila, makabaligya sila sa ilang plasma o dugo sa mahal nga kantidad.

Tan-awa ra gud na ang pangisip sa uban. Kuwarta lang ang anaa sa ilang hunahuna, aw tingali tungod sa kalisud sa kahimtang karon. Unya, kon matakboyan sila’g COVID-19 unya magkalisud, kinsa ang makagasto og dako? Dili ba ang gobiyerno?

Maayo lang kon asymptomatic, apan bisan gani og asymptomatic kay kon dad-on na sila sa mga isolation centers, ang gobiyerno na man ang moabaga sa ilang pagkaon. Mao nga binuang na ang nahunahunaan sa uban nga magpatakod aron lang makakuwarta kon maayo na.

***

Dinhi sa Dakbayan sa Sugbo, wa na ko ganahi kay dili na kami basta-basta nga makakuha og COVID-19 updates. Dili na mohatag ang Cebu City Health department kay ang DOH na kuno ang mohatag aron dili sila mauwawan kon makahimo sila’g mga sayop. Paita.

Ang ubang local government units mga alas kuwatro sa hapon naa na ang report, pero dinhi sa Dakbayan sa Sugbo, mogawas mga alas 9 sa gabii.