Salamat sa tanan

Niadtong third year theology pa ako, didto ko nadestino sa parokya ni San Francisco sa Maslog, Danao City. Nahimo nakong kura kaniadto si Padre Joey Belcina. Didto mi niya gipapuyo sa panimalay nilang Tay Judy ug Nay Lilia Miro. Mao ning hinungdan kun  nganong nasuod nako si Tay Judy ug Nay Lilia ingon man ang mga banay nilang Tay Leo Mancao Ypil family, Pepito family ug ang Aguilar family.

Nahimo silang avid supporters sa akong mga kawsa ug gani nahimong mahinungdanong kabahin sa akong panaw sa kinabuhi sa pagkapari. Nahimo silang saksi sa akong kalipay ingon man sa akong kaguol. Sa akong kalampusan ug sa akong kapakyasan. Sa laktod kabahin gyud sila sa kasaysayan.

Si Tay Judy pintok manulti ug direct to the point. Kun dili siya kauyon mosulti gyud apan at the same time amahanon. Dili siya magpanuko og hatag og tambag ngari kanako.

Si Nay Lilia mosayo gyud og mata kaniadto kay lagi maoy mangunay og andam sa pamahaw alang kanamo. Ang iyang pagkainahanon dako gyud kaayo og ikatampo sa iyang banay ug sa iyang mga higala nga nagtamod sa iyang pagkamaayo.

Subo palandungon nga ning panahon sa COVID-19 pandemic ang duha ka mga linalang nga nahiusa diha sa gugma ang nahimong nitaliwan na sa kalibutan. Ako mismo na shock kapaspas ba. Buot ko man untang moadto aron moduyog apan malisud alang kanako ang tanan tungod ning maong pandemiya nga nihasi kanato.

Mao nga ang espirituhanong buhat sa pag-ampo ug pagsaulog sa Santos nga Misa alang sa ilang pahanungdan akong pagahimoon dinhi sa Madridejos Alegria aron bisan kun ako halayo makapasalamat ra gyud sa gihapon.

Daghan kong nakat-onan gikan sa duruha. Ug ang maong mga pagtulon-an padayon nakong balonon. Si Nay Lilia mapailubong moputos sa mga pabawon niadtong mamista ko sa ilang dapit. Si Tay Judy ingon man ang iyang mga baruganan kalabot sa politika ug panlantaw sa kinabuhi padayong handumon ko. Kadtong mga higayon nga mag-inom mi og beer gawas sa iyang balay samtang hisgotan ang mga kagahappon sa kinabuhi. Salamat gyud kaayo!

Ang akong mga pag-ampo mao kini:

Sa imong mga kamot Amahan ang among mga igsuon itugyan! Dawata sila sa Paraiso! Malaumon kami O Ginoo! Rest well Tatay ug Nanay! Salamat diay sa pagdasig! Salamat diay sa pagbasa kanunay sa Banat News labina gyud sa akong lindog.