Tay-og

Dili pa lang dugay natay-og ang Sugbo sa hinay nga linog. Gani didto sa Davao del Sur padayon silang gilinog usab didto bisan kun hinay apan kanunay. Sinyales na ba kini sa kataposan?

Gani July 16, 2020 gilinog ang Papua New Guinea. Adunay tsunami warning kalabot niini. Daw sa nagkadaghan ang mga linog karong mga panahona.

Hinuon angkonon nato nga anaa man kita sa Pacific Ring of Fire mao nga dako kaayo og kahigayonan nga tay-ogon gyud ta.

Sa laktod, nahimong ordinaryo ang linog ug kabahin lamang sa liyok sa kinaiyahan.

Apan bisan pa man niini kita usab angayang bation og kahadlok labina ning panahon sa pandemiya.

Gihisgotan nako dinhi ang aktwal nga linog mahimong tectonic o volcanic in origin.

Apan dunay mga linog nga nahitabo mismo sa atong kinabuhi.

Gani ang uban nila mahitabo man diha sa atong mga damgo dili ba?

Kini tungod kay ang atong pagkatawo ingon man ang atong kinabuhi nahimong haguka ug kay haguka man natural tay-ogon matag karon ug unya.

Sama gud sa ekonomikanhong kahimtang sa atong nasud ug kanatong tanan karong mga higayona padayong nahasol ang kinatibuk-an sa atong pagkatawo. Ang atong hunahuna nahimong unstable sa pag-imagine sa mga lakang nga atong pagahimoon maka survive lang ning mga panahona.

Ang atong kasingkasing nikuba ug nipitik tingali sa paagi nga tensiyonado kay naputos kita sa kahadlok ning panahon sa kaway kasigurohan.

Ang atong kalag naluya ug nagpangita sa kapahulayan kay bisan gani ang kalibotan ning mga panahona padayon mang nihadla kanato ug gani nagpangita kita sa presensiya sa Dios sa atong kinabuhi. Asa man ang Dios?

Nganong sa kadugay sa pag-ampo nato sa Oratio Imperata padayon man pud nga mas nitaas ang kaso sa coronavirus?

Bisan gani ang pagpangalagad nga pastoral nahimong nababagan man gumikan ning social distancing nga butang.

Ang tanan vulnerable ning kahimtanga karon. Apan bisan pa man sa pagtay-og padayon kitang mangita og paagi just to strike the balance.

Tinuod mahinungdanon kaayo ang safety karong mga panahona apan mas mahinungdanon usab ang pagpabati sa mga tawo nga ang Dios kanunay’ng buhi ug nagpakabana.