Si Brod Engel Alaba

Suod siya nga higala nga sa akong tatay nga si Monsenyor Sindulfo Iriarte. Sa tanang mga progama anaa gyud siya nisuporta sa among amahan, ma bible study man hangtud na sa BEC Program. Sa Ignatian Retreat aktibo usab siya.

 Gani nahinumdom ko nga niadtong seminarista pa ko sa Spiritual Pastoral Formation Year kun SPFY usa siya sa mga facilitators sa Ignatian Retreat.

Hinuon niadtong panahona si Bro. Dindo Paradela man ang akong guide ug dili siya. Apan higala kami ni Tay Engel.

Daghan siya og mga seminarista nga karon mga pari na nga nahimong kabahin sa iyang kinabuhi. Mao nga salamat kaayo sa iyang presensiya ug sa iyang paningkamot nga makatampo sa pag-umol sa mga seminarista.

Sama sa ubang mga tawo duna sab siyay kaugalingong kasaypanan ug kakulangan. Apan bisan pa niini nga naningkamot sya sa pagpahimuot sa Dios pinaagi sa iyang pagpangalagad. Timailhan lamang kini nga ang simbahan dili lang alang sa mga pari kondili alang usab sa mga layko.

Gani daghan sa mga layko regardless sa background ug kahimtang ang naningkamot gayud nga moalagad mahimaya lamang ang Dios. Kasagaran nila matinund-anon ug mga kugihan. Daghan nila ang naningkamot nga mamahimong mga inspirasyon alang naong tanan.

Ingon ana kagamhanan ang grasya sa Dios labina kun kini molihok na sa tagsatagsa nato ka kasingkasing. Si Brod Engel gikan sa pagkayanong lay minister ngadto na sa pagka retreat facilitator usa lamang sa mga layko nga nihatag sa kinatibuk-an sa kaugalingon aron makaalagad sa simbahan. Angay ug matarong lamang nga siya pasidunggan. Brod. Engel salamat sa panaghigalaay, salamat sa imong        kaayo.

Sa imong mga kamot Amahan, ang amo karong igsuon itugyan. Dawata siya sa paraiso, malaumon kami O Ginoo! Pahulay nga dayon ihatag kaniya o Ginoo ug ang imong kahayag modan-ag unta kaniya hangtud sa kahangturan! Amen!

 Mahimong mahanaw ang imong lawas apan magpabilin ang imong handumanan….. Ning panahon sa Pandemiya bisan tuod ug dili kami makahatud sa imong katapusang puloy-anan kami kanimo maghinundom kanimo sa pag-ampo.