Dili mabasol

Dili nato mabasol ang mayoridad sa mga miyembro sa House Committee on Legislative Franchise sa ilang lakang pagbasura sa aplikasyon sa ABS-CBN Broadcasting Corporation alang sa bag-ong prangkisa niini alang sa laing 25 ka tuig.

Dili ikalimod nga aduna silay nakita nga mga trampas sa maong kompanya nga kinahanglan itul-id. Ug kini ang nag-unang hinungdan ngano nga ilang gihikaw ang bag-ong prangkisa nga maoy nagsira sa operasyon sa maong network.

Gani ang giingong kahiwian may kalabotan kuno sa obligasyon sa ABS-CBN sa bayranan niini sa buhis nga nakapaisa sa kilay sa mga sakop sa komitiba. Kini wala pay labot sa giingong kwestiyonable nga citizenship sa labing labaw nga opisyal niini.

Apan, sa laing bahin, dili usab nato mabasol ang bagang duot sa katawhang Pilipinhon nga nagbangutan karon nunot niining pagkapalong pagsibya sa maong kompanya nga kabahin na sa dagan sa ilang inadlaw nga pagkinabuhi.

Alang kanila, dili makatarunganon ang pagbasura sa aplikasyon sa maong sibyaanan alang sa bag-ong prangkisa tungod kay usa kini ka pagtuok sa kagawasan sa pamamahayag ug pagyatak sa katungod sa katawhan pagsagop sa benepisyo sa libreng paglawig sa inpormasyon.

Gawas pa niini, nagbangutan usab sila alang sa liboan ka empleyado sa ABS-CBN nga nakulban sa kaldero niining pagsira sa maong network, butang nga dili maayong tilimad-on taliwala niining dakong maldisyon sa coronavirus disease.

Ug dili usab nato sila mabasol sa ilang alegasyon nga kining tanan adunay dakong kalabotan sa dula sa politika. Nga basta ang labing gamhanan na gani ang mosalga, dayon gayud og yukbo ang mga alipures.

Mao na nga ang tan-aw sa mga mikontra sa lakang sa Ubos Balay Balauranan nga kining tanan maniubra sa naglingkod diha sa palasyo. Ilang nakita nga kabahin kini sa panimalos sa presidente sa iyang giingong dili maayong treatment sa kompaniya kaniya niadtong 2016 presidential elections.

Bisan pa sa mga legal nga basihan sa Kongreso pagbasura sa aplikasyon sa ABS-CBN alang sa bag-ong prangkisa niini, ang nakita sa ordinaryong katawhan mao nga ang nahitabo sa maong kompanya usa ka paglupig sa kagawasan sa pamamahayag.

Apan midesider na ang Kongreso ug angay lamang nga respetohan kini sa katawhan. Hinuon, mahimo pang maka-file og motion for reconsideration ang ABS-CBN. Apan dakong sagubangon ang pagbali sa maong desisyon, ilabina ilalum niining kasamtangan nga administrasyon.