Unsay nagpaabot sa Cebu City human

Naghuwat ang tanan sa mamahimong kaugmaon ilabi na sa dakbayan sa Sugbo kon mo-graduate na ba kini sa enhanced community quarantine ngadto sa general community quarantine inig ka Hulyo 16.

Sa interview sa media ni Cebu City Mayor Edgardo Labella gahapong adlawa, optimistic siya nga makab-ot ang gidahom nga GCQ kay matod niya nga bisan og taas ang kaso sa COVID-19 sa siyudad, taas man usab ang recovery rate nga more than 50% itandi sa ubang mga dapit.

Tinuod man usab ang giingon sa mayor kay taas lagi ang ang kaso sa Cebu City kay massive man pud ang contact tracing og ang testing.

Seguro kon ingon usab niini ang gihimo sa ubang mga dapit daghan pud tingali ang masuta nga positibo.

Taliwala sa paningkamot sa gobiyerno nga masanta ang pagkatap sa kagaw wala gihapon kiniy kapuslanan kon ang katawhan magpabilin nga masinupakon sa lagda.

Sa Alaska Mambaling lang pipila ka oras human gilibkas ang hard lockdown nagsabong naman dayon og manok ang mga tawo nga gitapok-an usab sa mga nanan-aw.

Kong ingon niini nga kinaiya ambot lang unsay padulngan nato niini kay murag wala namay kukahadlok ang mga tawo sa virus.

Unsay mamahimong kaugmaon sa mga molupyo sa syudad sa Sugbo ugaling magpabilin gihapon kita sa ECQ? Si Secretary Roy Cimatu gusto nang mag GCQ ang dakbayan apan si Secretary Francisco Duque murag tahado man kay lagi padayon ang pagsaka sa COVID-19.

Sa National Capital Region nga giluagan ang quarantine status midaghan gyud kuno og maayo ang kaso sa COVID-19 kay mga gahi man sad og ulo ang mga tawo didto.

Pareha ra dinhi sa Sugbo, dili mopatuo diin ang mga otoridad lang ang lipaton aron sila makapabadlong.

Luoy kaayo ang mga nagtinarong kay maamong man niining mga tawo nga nagtuo nga dili madutlan og virus kay ang mga kinaiya mas grabe pa sa kagaw.

Maayo lang motagawtaw nga murag experto nga dili kuno tinuod ang COVID-19, pastilan pagkahanggaw kay wala pa man seguro makatilaw.

Ang mga tambalanan dili lang sa Sugbo kondili sa tibuok nasod napuno na, ug ang mga medical frontliners nangasakit na busa delikado kaayo gyud kon matakboyan niining sakita.

Gawas walay available nga hospital, wala nap pud available nga menteryo kon namatay.

 Busa gikinahanglan magtinabangay ang tanan alang sa gitinguha nga kagawasan gikan niining maong balatian kay We Heal as One man kaha.