Nganong nahulga sila sa ABS-CBN
Isip usa sa 11,000 ka kawani sa ABS-CBN nga nameligrong mawad-an og trabaho, mokumpisal ko nga tinuod ang pasangil sa mga kongresista nga gamhanan ang among kompaniya. Kon krimen man ang pagkahimo sa ABS-CBN nga kinadak-ang kompaniya sa media sa nasud, di mi makiglalis, mangayo mi og pasaylo.
Nabatyagan nako ang gahom sa among kompaniya sa matag pangahas namo pagpangayo og tabang dinhi sa Sugbo alang sa mga biktima sa labing dagkong katalagman sa nasud. Nagbaha ang katawhan nga nihatod sa ilang mga hinabang.
* * *
Molista lang ko og tulo sa kinadak-ang Kapamilya relief campaigns:
Sa bagyong Ondoy sa Metro Manila niadtong 2019, ang Sugbo nakapada og kapin sa gatos ka 40-footer ug 20-footer containers, kinadaghanan sa tibuok nasud;
Sa bagyong Sendong sa Mindanao niadtong 2011, napuno ang kinatibuk-ang Jagobiao broadcast complex sa nagbuntaog nga mga hinabang ug kaliboan ka boluntaryo; ug
Sa linog ug bagyong Yolanda sa Kabisay-an niadtong 2013, labihan kadaghan sa mga hinabang nga nangabang mi og Sikorsky helicopter aron mas paspas nga mapadad-an og mga pagkaon ang labing hilit nga mga isla.
* * *
Talagsaong kamanggihatagon sa mga Sugbuanon sab ang hinungdan nganong nahimo nga institusyon ang labing dakong piyesta sa libreng mga pangalagad sa Sugbo ang Grand Halad sa Kapamilya nga gipahigayon matag Hunyo ug Nobyembre sa matag tuig sukad niadtong 2005.
Ang mga may katakos sa pagtabang ug ang labing nagkinahanglan og tabang mahimo ra gyud untang modangop sa mga buhatan sa gobyerno ug sa ubang pribadong mga kompaniya. Daghan silag kapilian apan gipili nila ang ABS-CBN.
* * *
Kon tinuod pang gigamit sa mga Lopez ang ABS-CBN ug kaming mga kawani sa pagpalambo sa ilang mga negosyo, wa unta mahimong batobalani sa pagtinabangay ang among mga sibyaanan di lang sa Sugbo kon dili sa ubang bahin sa nasud ug kalibotan.
Bisan sa bangis nga mga pakauwaw ug pagpanggukod, ang ABS-CBN maoy gipili sa mga Pilipinhon nga tinubdan sa inadlaw nga kasayuran ug kalingawan ug dangpanan sa labing dinaliang mga panginahanglan. Nabalaka ko nga ang pagsalig sa katawhan maoy ilang nasaypan nga dakong gahom sa ABS-CBN ug maoy nakahulga sa mga politiko ug mga negosyante. Kansang katuyoan wa maglakip sa pag-alagad sa Pilipino.
* * *
- Latest
