Ang among Zoom meeting

Mokuyog unta ko sa prosesyon apan kay lagi duna may initial meeting ang Southwest District mao nga nagdalidali ako og download sa Zoom App.

Salamat ni Feltom Joseph Homecillo ang aktibo nakong PYCC president sa parokya nga mitabang kanako ug miuban sulod sa maong panahon sa among virtual meeting.

Daghan ang mga kasinatian ug daghan ang nahimuot. Kini tungod kay lagi daghanan namo ang dili man gyud maantigo pa sa maong teknolohiya. Salamat ni Padre Dave Cantillas nga maoy nihan-ay ning tanan.

Kini man gud mga batan-on mga techy savy kaayo kini sila mao nga dali alang kanila ang paghimo sa ingon.

Sa akong bahin, nalingaw lang usab ako nga nagsud-ong kanila sulod ning maong kalihokan.

Kaanindot unta kun hologram na lang ang gamiton aron mas ma-feel nako ang Star Wars ambiance. Charot!

Ning panahon sa pandemiya nahimong daw sa virtual ang tanan. Gidid-an kita sa paghangop sa paagi nga physical kini tungod kay tungod sa kahadlok sa coronavirus, ang tanang mga initiatives ma-implement gyud sa walay langan. Kini ang gitawag og starvation of touch. Ambot lang kun unsa kahay dangatan nato niini kun kini magpadayon na lang sa kanunay.

Diin ang paghikap ug paghangop maoy mamahimong pinaka abnormal nga buhat nga himoon sa usa ka homo socialis nga mao ang tawo?

Sa laing bahin, akong nakita nga nahimong compacted kaayo ang global village gumikan ning hitaboa. Dili na kalas sa plite o gasolina.

Walay panahon nga mausik gumikan sa biyahe aron lamang pagtambong sa meeting. Ang tua sa layo mahimong duol na kaayo alang kanato basta nga dunay signal nga makatabang. Dili ba interesting kini?

Hinuon ang distansiya relative lamang nga kamatuoran. Kini tungod kay mag-agad kini sa atong pagsabot ug kasinatian.

Kay mahimong duol kaayo kita sa usa'g-usa physically, apan nahimong halayo ang atong pagbati. Mahimong halayo kita sa usa'g-usa physically apan padayon kitang gibugkos sa atong tagsatagsa ka mga pagbati ug paghigugma….. Zoom pa!