New normal backriders

Sa interview ni Secretary Eduardo Año sa Department of Interior and Local Government DILG, gipadayag niya nga tugotan na ang pag-angkas sa motorsiklo.

Apan alang lang sa mga couples sugod kuno karong adlawa. Pero dunay kondisyon nga gikinahanglan kadtong prototype model nga gisumiter ni Bohol governor Arthur Yap.

Gikinahanglan nga naay ali or barrier sa driver ug angkas niini nga dili gyud pwede magkakontak ang lawas o mapiskan sa laway ang driver ug ang angkas.

Pero inig gikan sa balay ug pauli magkahinangpanay man gihapon kay mag-partner man lagi.

Sa pangutana kong unsay ipasabot sa couple nga kadto lang ba nga kasado, ang tubag ni Año nga bisan kadtong nagpuyo or live in basta nagpuyo sa usa ka balay ang tugotan bisan gani ang manag uyab kuno basta gikan sa usa ka pinuy-anan.

Estrikto usab ang pagsul-ob kanunay sa facemask aron pagsiguro sa kaluwasan sa mga sakay sa motor.

Sigurado naa ni black and white nga tamdanan kay kong wala pastilan daghan masugamak ani sa dakop ilabi na og maglibog ang mga law enforcers sa lagda.

Kong mao kini ang gipangayo sa atong gobiyerno aw angayan lang gyud sundon aron makapaangkas na ta sa iyang mga asawa o kapuyo o uyab basta gikan lang sa usa ka balay.

Kong mapatuman man ugaling kini dako na kaayo og ikatabang sa mga tawo nga nag-antos sa kakuwang sa transportasyon karon.

Sa gusto ug sa dili, gikinahanglan man gyud nga motrabaho ang mga tawo ug lisod kaayo nga maglakaw lang kay dili mahatod sa bana kay dakpon lagi.

Sa katapusan hayag na ang pagpaangkas sa mga partners in life human mismo ang DILG ang mipahibawo niini.

Karong adlawa kun sugdan sa pagpatuman kong ready na ang mga motor sa desinyo sa new normal backride motorcycle.