GCQ lang diay gihapon

Masaligon si Secretary Roy Cimatu nga ideklarar na ang Cebu City ubos sa General Community Quarantine (GCQ) karong Hulyo 16, 2020.  Apan midugang siya nga i-mentinar gihapon ang mga sequential lockdowns sa ubang lugar.  Kining pasalig gihimo taliwala sa nagkadaghan gihapon nga kaso sa COVID-19 sa dakbayan. Isip gisaligan sa Presidente, ang deklarasyon ni General Cimatu maingon ta nga pagkumpirmar lamang nga siya nagmalampuson sa iyang tahas.  Bisan kon dili pabor ang kahimtang human sa Hulyo 15, mahimo gihapon nga matinuod ang gipasalig ni Gen. Cimatu nga ma-GCQ na ang dakbayan nga buot ipasabot: General Cimatu Quarantine.  Hala no!

Kwarta, dili bakuna, ang tambal

Adunay giproponer nga balaodnon si Senator De Lima (Senate Bill 1641) nga maghatag og libreng bakuna ngadto sa mga senior citizens.  Dili ba kaha uwahi na kining maong lakang?  Midangat na sila sa maong pangedaron tungod tingale kay taas-taas ang ilang immunity sa sagad nga mga sakit. Matud pa sa akong silingan nga senior, “Maypa ila na lang na’ng kuwartahon. Mag-unsa man ang taas nga kinabuhi kon way nahot.  Luya gihapon kay way kwarta”.  Baya no!

Bantay-salakay sa ayuda

Segun sa datos nga gipagawas sa kagamhanan sa America, dili momenos sa 12 ka kongresista ang giingon nga mipahimulos ug nahimong beneficiary sa programang ayuda sa gobyerno atol sa COVID-19 pandemic nga sila mismo ang awtor ug miaprobar.  Una gyud nga motilaw sa pagkaon ang kusinero.  Sila man ang nagluto, sila sab ang una’ng mokaon.  Dili diay solo sa Pilipinas ang maong kinaiya. Hasta America natakdan sa kagaw sa pangawkaw atol sa pandemya.  Paleho la!

Sa tuob magpalaban

Kapin sa usa ka gatos ka mga nurse ang giingon nga mipadayag sa ilang katuyoan nga mo-resign na sa ilang trabaho o ba kaha mo-AWOL sa ilang trabahoan.  Dili lang kakuyaw ug kahadlok sa ilang kahimtang ang rason sa ilang pag-resign.  Gimulo usab nila ang kagamay sa sweldo, naghinobra’ng kahago ug ang walay gitagana nga hazard pay.  Sa atong katilingban, kon dili ka motingog ug moreklamo, dili ka gayod matagad ug maatiman.  Kon mokagiw ug moundang na unya ang atong mga nurse, basin sa TUOB na lang kita magpalaban. Pastilaan!

Purlon ang dangatan

Agi ug pagpahinumdom sa katawhan sa mahimong sangpotanan niadtong dili mosunod ug maminaw sa mga lagda nga gipatuman pagbatok sa coronavirus pandemic, ang kagamhanan sa dakbayan sa Lapu-Lapu mipasuroy sa usa ka purlon sa kadalanan sa dakbayan.  Wala manunglo ang kagamhanan sa kamatayon sa iyang katawhan.  Gipahibawo lang nila ang mga lumolupyo sa mahimo nilang dangatan kon dili sila makat-on pagtuman.  Sakto ang mensahe nga gipadangat: “Stay at home aron dili masulod sa lungon”. Saoonz!