Abuso
LINTUNGANAY - Fred P. Languido (Banat) - July 5, 2020 - 12:00am

Sayong nanaog sa ilang pinuy-anan ang 59 anyos nga stroke survivor didto sa Barangay San Nicolas niadtong Huwebes aron sa pagpalit og pagkaon alang sa ilang pamahaw.

Samtang nagsubay sa Carlock Street gawas sa Sityo Figueroa diin siya nagpuyo, nasugatan niya ang nagpatrolya nga mga sakop sa Special Action Force (SAF). Ang babaye, kansang pangalan wala itug-an ni Kapitan Clifford Niñal, nagkwentas sa labihan ka dako nga quarantine pass.

Apan ang kapolisan nagduda nga peke ang iyang pass tungod kay wala kunoy silyo gikan sa barangay.

Tungod niini gidakop ang tiguwang ug gisilutan sa kapolisan. Matud ni kapitan Niñal nga gipalakaw sa mga polis ang babaye gikan sa Carlock diha sa Barangay San Nicolas paingon sa Barangay Basak ug pabalik sa iyang gigikanan.

Gibana-bana nga duna ni gilay-on nga unom ka kilometros. Ang anak sa babaye labihan kahingawa tungod kay bag-o lang kuno na stroke ang iyang inahan og init na ang adlaw dihang gipabaklay kini sa kapolisan.

Kinsay naghatag og pagtugot sa kapolisan nga silutan ang mga nakalapas sa quarantine protocols?

Kun dunay kalapasan nga nahimo nganong dili pasakaan og kaso inay nga magbuot-buot ang mga polis pagkastigo.

Ang nakapait kay dili peke ang quarantine pass. Ang problema mao ang kakuwang sa kumunikasyon gikan sa dakbayan sa Sugbo nga maoy nag-isyu sa pass ug sa mga awtoridad nga nagpatuman sa lagda sa quarantine.

Nalikayan unta ang mga panghitabo nga sama niini og gitarong pa pagpaabot ang mensahe ngadto sa kapolisan.

Ang mas seryosong isyu hinuon niini mao ang maisip nga pag-abuso sa mga polis. Tataw nga paglapas sa tawhanong katungod ang ilang gihimo nga pagpabaktas sa tiguwang og unom ka kilometro ilawom sa naglagiting nga kainit sa adlaw.

Ang ingon niini nga matang sa abuso maoy usa sa mga hinungdan nganong daghan ang supak sa bag-o lang naaprobahan nga anti-terrorism bill.

Kun karon yanong yatakan sa ubang mga abusadong tinugyanan sa balaod ang katungod sa ordinaryong sibilyan, unsay makapugong nila kun duna na silay magamit nga hinagiban pagpatuyang sa ilang pangabuso?

Hinaut di lang kutob sa pasalig ang himoon sa mga opisyal sa kapulisan. Mas makaayo sa imahi sa PNP ug makatabang pagkumbinsir sa publiko nga way luna diha sa disenting organisasyon ang mga abusado kun makita sa katawhan nga manubag sila sa ilang gibuhat.

STROKE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with