Hagiton ug pagahiay'g ulo

Mipasidaan si Foreign Affairs Secretary Teodoro Locsion, Jr. ngadto sa China og usa ka “ugdang ug seryoso nga tubag” kon ugaling ipadayon sa naulahi ang pagpahigayon og military exercise sulod sa teritoryo sa Pilipinas diha sa South China Sea.  Wala mosulti ang kalihim kon unsa nga matang sa aksyon o tubag ang buhaton sa Pilipinas apan layo kaayo huna-hunaon nga gubaton sa Pilipinas ang China.  Di ba kaha hagiton ni Secretary Locsin ang mga Intsik og contest sa pagahi-ay og ulo diin ang mga constestant sa habig sa Pilipinas mao ang taga-dakbayan sa Sugbo? Hala no!

Alangan og ‘tabalon’

Dili lang diay sementeryo ang naproblema sa nagkadaghan na sa nangamatay tungod sa coronavirus, lakip na usab ang mga mortuaryo ug mga crematorium sa dakbayan. Tungod niini, mipagawas si Konsehal Joel Garganera, og advisory nga naghiktin na sa pagdala sa mga patay’ng lawas gikan sa laing lugar paingon dinhi sa dakbayan.  Sa pangutana unya kon unsa’y ilang buhaton sa ilang mga minatay, nahinumdum ko sa tubag sa akong silingan nga nagkanayon, “Alangan na man ug ‘tabalon’, di ilubong”.  Pagkatoytoy!

Wa pa makasal, nagbuwag na

Adunay balaodnon nga gipasaka si Kabayan party-list Representative Ron Salo aron pag-amendar sa Family Code sa tumong nga matugotan na ang gitawag nga “virtual wedding” diin mahimo na’ng ipahigayon ang kasal “ON-LINE” o pinaagi sa internet.  Buot nila hatagan og kasayon ang pagpahigayon sa seremonyas sa kasal apan wala pa nila matagad ang kahimtang sa internet nga daw ulod nga nagkamang sa kahinay.  Kon pananglit mawagtang ang signal sa internet samtang gipahigayon ang seremonyas, di kaha mapurnada ang kaminyoon?  Mao na’y giingon, “Wa pa gani makasal, nagbuwag na”.  Madahaan!

Wala’y perpekto

Gibutyag ni Cebu City Administarator Floro Casas, Jr., nga mokabat na sa 99% sa gidaghanon sa ECQ Passes ang naapod-apod na ngadto sa katawhan.  Wala makab-ot ang 100% nga pagpanghatag kay aduna pa’y dul-an sa usa ka libo ka passes nga depektoso nga giilisan pa ug ipahigayon pa ang pagpanghatag.  Malisod gayod diay kab-oton ang 100% nga target sa mga gimbuhaton kay bisan gani ang advertisement sa rubbing alcohol, nangangkon ra man nga makapatay ang ilang produkto kutob lang 99.9% sa kagaw.  Walay perpekto sa kalibotan!

Kanahan ang masinupakon

Human ipaubos ang dakbayan sa Sugbo sa ECQ, adunay hagit si Secretary Roy Cimatu ngadto sa mga residente sa dakbayan: Undanga ang Quarantinas sa Cebu. Ang maong hagit gitumong aron motabang ang mga lumolupyo sa paglibkas sa ECQ pinaagi sa pagtuman sa mga lagda nga sa kwarentinas.  Angayan nga mobarug ang taga-dakbayan sa maong hagit aron usab mapamatud-an nga dili kita mga gahi’g ulo.  Kay ginaingon baya nga taliwala sa kalisdanan nga daw malisod nga buntogon, ang pagka-butigol ug pagka-masinupakon nagpaila lang hinoon sa atong pagkakanahan ug pagkatunggol.  Baya no!