EDITORYAL - Di Martial Law

Daghan ang nabuhian og paglaum sa dihang gipahugtan ang seguridad ug gibalik ang Cebu City sa enhanced community quarantine (ECQ) kay dako kini kaayo og matabang pagpakgang sa pagkuyanap sa novel coronavirus. Ang Cebu City napaubos naman unta sa general community quarantine niadtong tungatungang bahin sa Mayo, apan kalit nga misirit ang pagsaka sa mga kaso hinungdan nga gibalik sa ECQ.

Ang IATF-MEID pagpadala og dugang kapolisan gikan sa laing rehiyon, apil niini ang mga sakop sa Elite PNP Special Action Force aron motabang sa pagpatuman sa health protocols.

Tinuod dako gyud kaayo og kalainan ang kahigpit sa unang ECQ sa bag-ong ECQ karon, mas daghan na ang mga nagbantay ug mas estrikto.

Apan nagkaguliyang lang tungod sa bag-ong QR Coded Passes nga giingong bunga sa miscommunication gikan sa City Hall ug sa kapolisan nga nagbantay.

Hinuon napasabot na kini sa tanan apan uwahi na kay daghan nang mga tawo ang nahasol tungod giembargohan sa ilang passes kay gidudahang peke ang ilang dalang QR coded pass, bisan mao gyud kadtoy gihatag sa mga barangay.

Apan dunay mga reklamong nanggawas nga naghinobra sab ang pipila ka mga polis kay diretso man nila gipangsilotan ilang gidakop.

Mura na og gikumkom sa mga polis ang balaod diha sa ilang mga kamot kun mao na. Sila maoy namasangil, sila sab maoy mosilot, husto ba diay ni?

Angay untang lantawon pud, ilabi na sa mga nadestinong mga polis nga dili taga Cebu, nga nag-antos na intawon ang mga tawo dinhi sukad pa niadtong bulan sa Marso tungod aning pandemic.

Husto nga estriktuhon ug silotan kadtong mga nameke og QR Coded pass ug mga nakalapas sa protocols apan klaruhon lang nga kadtong sad-an ray mahasol.

Dili makatarunganon nga haruson nalang ang tanan unya tumban ang ilang katungod nga makadepensa sa kaugalingon sa tukmang venue sama sa pagpasaka og kaso inay nga hasion ug silotan. Dili ni Martial Law. Aron way problema, kinahanglang mosunod ang tanan sa mando sa otoridad. Sunod sa tanang health protocols ug tabangan ang gobiyerno nga masanta kining COVID-19.