Sulirang dala sa COVID-19

Nagsagol na ang suliran nga sulbaronon sa gobiyerno nga dala sa coronavirus disease o COVID-19. Masumada ang maong mga suliran gikan sa pagpugong sa virus hangtod na sa pagpahiluna sa mga natakdan sa virus.

Suliran sa gobyerno unsaon sa pagpasabot ang mga tawo sa pagka peligro sa COVID-19 nga mikutlo na og sobra sa tunga sa milyon ka mga kinabuhi lukop kalibotan apil na niini ang sobra sa usa ka libo nga namatay dinhi sa nasud sa Pilipinas.

Suliran sa gobyerno ang pagbaliwala lamang ug sa paglapas sa katawhan sa gipatuman nga health protocols aron masulbad ug dili na mokuyanap pag maayo ang COVID-19.

Bisan ang gihimong mga Barangay Isolation Center nga  gituohan sa lokal nga kagamhanan sa Sugbo nga sulbad sa pagkuyanap sa virus nahimo pod hinuong suliran nga matud pa ni Secretary Roy Cimatu nga gitahasan ni Presidente Rodrigo Duterte sa pagsulbad sa COVID-19 sa Sugbo, nakapasamot sa pagdaghan sa virus.

Hinungdan, ang isolation center sa kada barangay sa dakbayan sa Sugbo iya na pod kini nga ipa-isolate halayo sa kada barangay.

Suliran sa gobiyerno kun asa ipahiluna ang nag-awas nga mga pasyente ug ang nagkuwang nga mga medical personnel sa mga pampubliko ug pribadong tambalanan sa dakbayan sa Sugbo.

Suliran sa gobyerno ang paghatag og ayuda sa mga nagbagulbol na nga katawhan nga apektado kaayo sa virus tungod sa limitado nga resources niini.

Suliran usab sa gobyerno kun asa ipahiluna o asa ilubong ang mga namatay sa COVID-19 tungod kay pulos na puno ang mga menteryo ug ang ka mahal sa bayranan sa pagpa-cremate ug ang kadugay sa pagpa-cremate tungod sa naglinyang patay nga gi-skedyol para sa kremasyon.

Kining maong mga suliran dili gayod masulbad kun dili mosuporta ang katawhan.