Quarantine pass

Nahimong sentro sa bugal-bugal ang bag-ong mga quarantine passes nga gipang-apud-apod sa dakbayan sa Sugbo hulip sa unang 250 mil ka mga passes nga gikanselar isip kabahin sa pagpahugot sa dakbayan sa pagpatuman sa mga lagda sa quantine aron malikayan ang pagkatap sa COVID-19.

Apan labaw sa mga bugal-bugal tungod sa kadako sa bag-ong quarantine pass ug sa kintahay security feature niini aron dili mapeke, ang labing seryoso nga isyu mao ang gidaghanon sa giimprinta nga mga pass.

Matud sa dakbayan nga 178 mil lang ka mga pass ang gikinahanglang iimprinta ug iapud-apod sa matag pinuy-anan. Matud ni Mayor Edgardo Labella nga ang gidaghanon gibasi sa listahan nga gihatag sa Department of Health kanila.

Resulta daghan sa mga pinuy-anan ang wala kahatagi og quarantine pass tungod kay klarong kuwang ang gidaghanon sa ilang giimprinta. Basi sa talaan sa Philippine Statistics Authority dunay gibana-banang 213 mil ka mga pinuy-anan dinhi sa dakbayan sa Sugbo.

Ambot giunsa pagkwenta, apan dili man tingali rocket science ang gikinahanglan aron ta masayod nga di gyud paigo ang 178 mil ka quarantine pass. Nganong ang DOH man sab maoy nagbuot pila ka pass ang gikinahanglan?

Ang dakbayan maoy mas labaw’ng nasayod pila ka mga panimay ang dia sa syudad sa Sugbo. Kun ang simpleng pagpanghatag sa mga quarantine pass dili mahimo og tarong sa mga opisyal sa dakbayan sa Sugbo, dili na ta mahibulong nganong ang dakbayan sa Sugbo maoy nag-una sa mga dapit sa nasud nga dunay labing daghang kaso sa COVID.

Atol sa press conference kagahapon uban sa mga opisyal sa Inter-Agency Task Force, gipangutana si Mayor Edgardo Labella unsay plano sa syudad sa daghan pa nga mga panimay, labi pa kadtong anaa magpuyo sa mga condominiums nga wala makadawat og quarantine pass.

Ang tubag sa mayor nga paadtoon lang sa mga barangay kapitan. Unsa may mahimo sa mga kapitan kun kuwang gyud ang quarantine pass nga inyong gihatag? Nganong ipasa man ni Labella ang responsibilidad ngadto sa mga opisyal sa barangay nga iya man kini sa dakbayan?

Ang haguka nga baroganan ug liderato sa mayor maoy usa sa mga mabasol niining atong kahimtang karon.