Pait pa’s panyawan

Gidayeg ni Rabindra Abeyasinghe, World Health Organization (WHO) representative, ang Pilipinas sa “sayo” niini nga pag-imponer og lockdown aron kapugngan ang pagkuyanap sa COVID-19.  Apan midugang si Abeyasinghe nga wala ang WHO magkumparar sa performance sa Pilipinas sa ubang nasud.  Sayod kita sa mapait nga kamatuoran nga ang Pilipinas adunay labing daghan nga kaso sa COVID-19 sa tibuok Western Pacific Region.  Nangatik ra man tingale ang WHO. Ang panyawan, bisan asukalan sa makadaghan, magpabilin gihapon ang ka-pait niini.  Ilara Tits!

Mosalig ‘ta’s atong datos

Sa laing pagpamulong, miingon usab si Rabindra Abeyasinghe nga ang paglugak sa lagda sa lockdown nakapasaka sa kaso sa COVID-19 dinhi sa Pilipinas ngadto sa “makapabalaka nga kahimtang” kon “worrying levels.” Sukwahi kini sa mga pagdayeg nga iyang gipamulong sa unahan.  Tuyo ba sa WHO nga tabunan ang tinuod nga kahimtang sa pandemic?  Dili angay mokumpiyansa ang IATF sa managlahi nga pamahayag sa WHO.  Ang datos nga atong gihuptan maoy angay basehan sa mga plano pagbatok sa COVID-19. Pag-chure WHO uy!

Managlahi nga bersiyon

Matud pa ni Dean Raul Mendoza, mas mahinungdanon ang pagpatuman sa “rule of law”, kay sa pagpakunhod sa buhis kon buot kita modani’g mga langyaw nga magpapatigayon.  Gihimo niya’ng ehemplo ang Manila Water kinsa mi-waive sa multi-billion pesos nga daug nila sa kaso batok sa gobyerno.  Kabahin lang kini sa tibuok sugilanon.  Ang laing bahin nagtug-an usab nga ang pagdaug sa Manila Water naggumikan sa kontrata nga dili makiangayon ug labihan ka oneroso batok sa gobyerno.  Managlahi ang bersyon matag sugilanon. Isip-isip pud panagsa!

Relihiyon ug politika

Naalarma si Konsehal Dave Tumulak kay nag-anam na kahurot ang luna sa mga sementeryo aron malubngan sa mga nangamatay, COVID-19 man ang hinungdan o laing matang sa sakit. Mipalabang siya’g resolusyon nga nag-awhag nga mapadali ang pagtukod og bag-ong sementeryo.  Sa Lukas 9:60, miingon si Kristo,“Pasagdi ang mga patay nga maoy magalubong sa ilang kaugalingong mga minatay”.  Kon literal kini nga sabton, sulbad na ang problema sa sementeryo. Dili gyud magtakdo ang relihiyon ug politika.  Saoonz!

May’pa maglana’g potot

Namulong si DOH-7 spokesperson Mary Jean Loreche nga morekomendar ang ilang buhatan ngadto sa IATF nga ibutang na ang Cebu City ubos sa GCQ human sa Hunyo 30, 2020.  Apan mianunsyo na si Presidente Duterte nga magpabilin una ang Cebu City ubos sa ECQ. Kon basketbol pa, napalakan ang DOH sa ilang attempt niining kalakiha. Alang sa Presidente, way basehan ang rekomendasyon labi na kon tan-awon ang gidaghanon sa kaso sa niaging adlaw nga miabot og 353. Matud pa’s mga tiguwang, “May’pa maglana’g potot’! Stay at home lage!