Insakto si Duterte
SAKSAK SINAGOL - Lucky Malicay (Banat) - July 1, 2020 - 12:00am

Daghan ang nangyam-id dinhi sa dihang giingnan ni Presidente Rodrigo Duterte sa niaging semana ang mga Sugboanon nga mga gahi og ulo ug mga suberbiyo tungod lagi sa atong pagbaliwala sa lagda sa community quarantine.

Nga kini usab ang hinungdan ngano nga ang dakbayan sa Sugbo, sa tanang lugar sa nasud, miligid pagbalik ngadto sa enhanced community quarantine gikan sa general community quarantine gumikan sa grabe nga pagsaka sa kaso sa coronavirus disease.

Adunay mga mipiyait pagbalik sa siyudad sa ECQ. Matud sa sektor sa mga magpapatigayon, counterproductive kuno kini sa dakong paningkamot pagbangon pag-usab sa lokal nga ekonomiya. Apan walay nahimo ang tanan.

Apan napamatud-an gyud nga insakto si Duterte sa iyang pamahayag kabahin sa pagkagahi sa ulo ug pagkasuberbiyo sa mga Sugboanon.

Kini sa dihang usa ka barangay ang nagpahigayon og prosesyon nga nakalapas sa lagda sa ECQ.

Tiaw mo bang gatusan ang mihugop sa kadalanan sa Barangay Basak San Nicolas atol sa kasaulogan sa ilang piyesta aron pagsaksi sa usa ka relihiyosong prosesyon nga klarong nakalapas sa social distancing protocol.

Miani og dakong kontrobersiya ang maong kalihokan taliwala niining kampanya batok sa COVID-19. Hinungdan nga gipailalum sa inbestigasyon ang mga opisyal sa barangay ug mga nagpaluyo sa maong prosesyon.

Gani gipasakaan na og kaso nga kalapasan sa quarantine rules sa kapolisan ang giingong mga responsable niini.

Kini lakip na ang mga opisyales sa barangay nga morag wala usab kabadlong sa mga nagpaluyo sa maong kalihokan.

Hinuon, klaro nga resulta na kining pagpasaka og kaso sa ilang pagpabaya sa lagda sa social distancing. Kay lagi mas gihatagan nila pa og gibug-aton ang paghugop sa kadalanan atol sa prosesyon kay sa dakong panginahanglan sa social distancing.

Mao nang insakto sa iyang pamahayag si Duterte kabahin sa kagahi ug pagkasuberbiyo natong mga molupyo sa Sugbo.

Kay lagi bisan sa taliwala dakong hulga sa coronavirus, mas gipili pa sa uban ang mag-prosesyon sa kasaulogan sa piyesta.

Nahinumdom nuon ko sa estorya kabahin sa usa ka tawo kinsa nag-ampo sa Ginoo nga panalipdan siya sa iyang paglangoy padulong sa pikas tampi sa dakong suba bisan pa sa dakong risgo niini.

Milangoy gayud siya bisan pa man sa daghang buaya nga nag-ubog sa suba. Tuod man, wala gyud siya kaabot sa pikas tampi.

Ang leksiyon niini mao nga dili gayud magsilbi ang atong mga pagsangpit sa kahitas-an kon molangoy gayud kita taliwala sa dakong risgo.

Sa atong mga pag-ampo, kinahanglan nga iduyog usab nato ang atong mga pagmatngon.

RODRIGO DUTERTE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with