Cebu City napikhan
JAV, BANATI! - Javier Tapulado (Banat) - June 29, 2020 - 12:00am

Dili matakpan ang tinuod. Dihang misugo si Presidente Roa Duterte nga ipasusi sa iyang mga sinaligang IATF ang dakbayan sa Sugbo nganong nagkaanam kadaghan ang kaso sa nataptan sa COVID-19, nakit-an nila ang kinatibuk-ang hulagway sa matuod nga hinungdan.

Busa, daling nakadesiyon si Tatay Digong nga ipasinati sa taga-Cebu City ang pagpas-an na usab sa Enhanced Community Quarantine (ECQ) sa ikaduhang higayon nga mas bug-at pa kon ikumparar sa ECQ Part I.

Maila sa amahanong panagway sa presidente, ang dakong kadismaya nganong pakyas ang katawhan, gikan sa mga lider ngadto sa mga lumolupyo, pagtuman sa tanang protocol o balaod nga nalatid ubos sa ECQ nga gituyo pagpanday alang sa kaayohan sa tanan.

Kay sama sa usa ka mapinanggaong Tatay, monas ginhawa niyang paningkamot nga mahataga’g tabang ang tanan niyang anak (kitang katawhan) sa tumong nga dili manggawas sa mga panimalay. Apan unsa bay gibawos sa uban natong mga kaigsoonan? Inay motuman, pirmeng gisupak! Busa, migrabe ang pagtinakdanay sa COVID-19!

Gumikan niini, mipahungaw si Tatay Digong sa iyang kahiubos. Matud niya: “Kamong taga Cebu, ayaw lang mo kasuko nako. Magprangka lang ta…Pag-abot nako diha sa inyo, prangkahan ta mog usab. Gahi mog ulo. Dili lang ni karon. This is not the first national emergency nga ang Cebuano is morag hinay molihok. Ug unya, kon molihok, magyawyaw pa.”

Daw pino lamang kusi, pero sakit! Pagkasulti mubo. Apan tanan, igo!

Bitaw. Nganong nagkaanam man kadaghan ang badlongon sa Cebu City panahon sa miaging ECQ ug GCQ? Mao kini ang angay hinuktokan sa atong mga lider nganong napakyas sila sa pagpugong?

Diin ba sila nagkulang? Ug asa sila naghinobra? Dapat sa pagpangalagad, parehas ang timbang.

Buwahan, walay mapunta sa itaas ug walay mayunyon sa ubos. Kay dinhi lang nato maani ang respeto sa atong isig ka ingon. 

Ning pagpadala ni Tatay Digong dinhi sa atong dakbayan kang DENR Secretary Roy Cimatu, kinsa gitahasang maoy mangulo sa kampanya batok COVID-19 human mapikhi ni Duterte ang Cebu City, nagpaila lang, nga dili kaya sa atong mga lider ang pagsumpo sa mga badlongon nga morag atua na hinuon makig-abin sa COVID-19.

Unta, molampos si Cimatu ning iyang bag-ong dakong misyon.

IATF
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with