Hukom nga pinasagad

Gisakripisyo pag-ayo ni Environment Secretary Roy Cimatu ang katawhan sa Dakbayan sa Sugbo tungod sa iyang kamandoan nga dili na kini pagawason sa ilang panimalay human niya sugoa ang kapolisan nga dili na ipatahod ang Quarantine Pass nga giisyu ni Mayor Edgardo Labella.

Utokan baya unta kini si Cimatu, ilabi na nga 76-anyos na siya ug daghan na’g kasinatian. Nahimo na gud siya nga pangulo sa Armadong Kusog sa atong nasud ug kay higala man sila ni Presidente Duterte, gitudlo siya nga pangulo sa DENR.

Tungod tingali kay retired general man si Cimatu, napilian siya ni Presidente Duterte nga maoy mopatuman og mga estrikto nga mga lagda aron dili na tugotan ang katawhan nga magsige’g panggawas sa ilang kabalayan aron nga malikayan ang pagkuyanap sa Corona Virus.

Nalipay ta sa pagpakabana ni Presidente Duterte kay wa man gyud masumpo ang pagsaka sa gidaghanon sa COVID-19 cases dinhi sa Dakbayan sa Sugbo. Apan para nako, dakong sayop ang gihimo ni Cimatu nga gipakanselar dayon niya ang mga quarantine passes nga giisyu sa mayor.

Mora pa gani og way batasan ang kapolisan nga sila maoy unang nipahibawo nga dili na tahuron ang mga quarantine passes nga giisyu ni Mayor Labella. Makapangutana ta kon ania na ba kita ubos sa Martial Law?

Kon dili pa kita Martial Law, ang mayor mas gamhanan pa kay ni Cimatu nga tinudlo lang ni Presidente Duterte, samtang ang mayor gipili sa katawhan. Ang kapolisan sab, midiretso lang pag-isyu og memorandum nga nagpahibawo nga kanselado na ang mga quarantine pass nga giisyu sa mayor.

Wa gani nila itataw kon duna ba’y hatagan og “exemption” sama niadtong mga nagtrabaho para sa kagamhanan sa siyudad. Sa tanto nilang pagdali-dali, wa na nila magamit pa ang ilang mga utok, nga mga bright man unta sila.

* * *

Unya, para kanila ni Mayor Labella ug ni Presidential Assistant for Visayas Mike Dino, nakamahay sab ko kon ngano nga wa man sila mosupak nga diha-diha dayon nga ipatuman ang pagpakanselar sa mga quarantine pass.

Daghang tawo ang wa makapangandam, way mga bugas nga ilang magamit isip kunsomo sa pamilya, unya dili na sila makagawas aron mamalit?

Kon ako pa maoy mayor, ug ako pa ang tinudlo ni Presidente Duterte nga iyang pangabaga, pasabton gyud nako si Cimatu nga hatagan usa gyud og mga duha ngadto sa tulo ka adlaw ang katawhan aron makapangandam.

Ang uban wa na gani kuwarta nga ikapalit og pagkaon, unya pugngan na hinoon ninyo nga makagawas? Kon dili sila mangamatay sa Covid, mangamatay sila sa kagutom!