EDITORYAL - Target sa SAP

Nagsugod na ang imbestigasyon ug pagpasaka og kaso batok sa mga opisyales ug uban pang gipasanginlang nalambigit sa iregularidad sa pagpanghatag sa social amelioration program nga ayuda sa gobiyerno ngadto sa mga naapektahan sa novel coronavirus pandemic.

Ang DSWD adunay gipasunod nga guidelines sa kun kinsa ang mamahimong benepisaryo sa SAP apan daw daghan ang mga wala masayod kun kinsa gyud ang target niini.

Sa pagtuo sa kadaghanan, kadto lang gyung mga poorest of the poor maoy pahatagan sa SAP, apan diha sa guidelines sa DSWD ang tanang vulnerable sector maoy tabangan. Ang daan nang nalista nga poorest of the poor aduna nay kaugalingong hinabang gikan sa 4Ps program sa DSWD, dunay para sa mga indigent senior citizens ug PWDs.

Apil sa benepisaryong target tabangan sa gobiyerno ang mga naa sa informal economy workers, o kadtong mga nagtrabaho direkta o okasyon-okasyon lang ang trabaho nga ang sweldo mag-agad lang pilay ihatag sa nagkuha sa ilang serbisyo, subcontracted workers, homeworkers o kadtong nagtrabaho diha sa ilang balay sama sa pagproseso og mga goods o materyales nga gipatrabaho sa ila.

Apil sab ang mga katabang nga wala na mapasweldohi o wala na katrabaho tungod sa pandemiya. Mga drayber sa mga pasaheroan, transport network companies,  mga Grab drivers, micro-entrepreneurs and producers sama sa mga ginagmay nga negosyo, tahianan sa balay, food processing, sarisari stores, maguuma nga di benepisaryo sa 4Ps, kadtong mga “no work, no pay” nga trabahante, mga na stranded nga mga trabahante.

Mga underprivileged ug mga walay pinuy-anan; kadtong mga naa sa vulnerable sectors nga kasamtangang gipaubos sa clinical or hospital procedures sama sa dialysis ug chemotherapy, o kadtong bag-ohay lang napaubos sa major health surgeries o organ transplants.

Ug daghan pang uban nga ang social workers ray nakahibalo ug modesisyon kun angay ba silang tabangan human sa interbyu.

Kinahanglan lang nga klaruhon kini tungod kay dili ikalimod nga daghan sab sa mga nangreklamo dili man sab angayan nga makadawat ug buot lang samukon ang ilang mga di ganahang mga tawo diha sa barangay.