Sa dihang giablihan og balik ang mga Simbahan

Hunyo  7, 2020: Domingo sa Santisima Trinidad Mga Pagbasa: Ex. 34;4b-6.8-9/Dn. 3/2 Cor. 13;11-13/Jn. 3;16-18

Dako kaayo ang kalipay sa kadaghanan nga ning tungora naghinamhinam nang mosimba sa mas physical nga paagi ug dili lang sa virtual diha sa mga online masses.

Hinuon padayon pa gihapon ang pagmatngon ug pagpanalipod sa kaugalingon pinaagi sa pagbansay sa mga precautionary measures sama sa pagsul-ob og mask ingon man ang pagpahigayon sa social distancing.

Mao nga dinhi sa among simbahan among gipaningkamotan nga mapahimutang ang mga foot bath ingon man ang mga karatula kun asa dapit ang palingkoran sa mga tawo ingon man ang paggamit sa mga thermal guns.

Salamat sa mga BHW sa Madridejos uban sa supota ni Capt. Raul Guisadio inabagan ni Hon. Feltom Homecillo sa dihang gihan-ay ang mga pamaagi.

Salamat pud sa uban nga nitabang to mention a few ang magtiayong Truman ug Joyce Guardiario ingon man silang Mam Frances Jayno ug kapid-an sa mga parokyano nga mibulig ug sa Parish Pastoral Council sa pagdumala ni Bro. Joy Redula.

Karong Dominggoha gisaulog sa tibuok simbahan ang solemnidad sa Santisima Trinidad. Ang tulo ka mga persona sa usa lamang ka Dios.

Daghan ang nag-ingon nga lisud kaayo kining sabton apan kun buot hunahunaon ang misteryo mahimong matugkad diha sa natad sa relasyon. Relasyon nga gihimong lig-on diha sa paghigugma. Relasyon nga gihimong masabtan diha sa pagkamasinugtanon.

Ning panahon sa pandemic nahimong daw gihagit ang atong naandang pagsabot sa relasyon. Sa kanhiay nga normal kita gidapit aron mamahimong mas duol sa usag usa mao nga dili maayong magtinihik sa atong mga gakus.

Sa laing bahin, karon gihimo kita nga mahilayo kay ang pag-social distance sa usag usa pagpadayag man sa gugma ngadto sa atong mga mahal sa kinabuhi.

Dili kita buot nga mamahimong hinungdan sa takod nga maoy gikahadlokan sa kadaghanan.

Busa angayan lamang nga kita mamahimong andam niining tanan.

Makahikap man o dili ang mahinungdanon anaa ang diwa sa pagpakabana kay ingon ana man ang hinungdan kun nganong gitawag kita ingon nga Trinitarian Church tungod sa Santisima Trinidad nga maoy modelo sa giisip natong relasyon, ingon man kun nganong gitawag kitang katilingbanon tungod kay Santisima Trinidad mao man ang sukaranan sa tanang matang sa katilingban.