Side car sa kampanya batok druga

Mipasidaan si DILG Secretary Eduardo Año sa mga drug syndicates nga ang paglugak na unya sa mga quarantine protocols nagpasabot nga panghingusgan na usab ang kampanya batok sa ginadili nga druga. Mahimong gamiton sa kapolisan ug ubang drug enforment agents ang motorsiklo nga gitauran ug sidecar alang unya sa paglutos sa mga sindikato sa ilegal nga druga.  Sa maong paagi, mapamatud-an ang ka-bulawanon sa maong sugyot ni Sec. Año ug aron usab mapatuman ang physical distancing. Pagkatoytoy!

Balik-kalsada na usab

Kapin sa 200 ka mga street dwellers ang nahibalik na usab karon sa kadalanan human sila temporaryong gipasilong ug giatiman sulod sa duha ka buwan didto sa Barangay San Nicolas Proper sa panahon sa ECQ.  Samtang ang kasagaran kanato nalipay nga makabalik na sa kanhiay natong kahimtang, hayan naguol ang mga street dwellers nga nahuman na ang ECQ.  Mabalik na usab sila sa ilang mapait nga kahimtang nga mao ang paglaroy-laroy ug pagpakilimos sa kadalanan.  Tinuod gayod ang panultihon nga “Some good things never last”. Faeetz!

Nagka-weirdo ang solusyon

Naglaraw karon ang kagamhanan nga hatagan og alternatibong pangingabuhian ang mga jeepney driver pinaagi sa pag-hire kanila isip mga “contact tracers” samtang dili pa tugtan ang mga pampasahero’ng jeepney nga mobiyahe sa kadalanan.  Kon madayon ang maong laraw, mausab na ang naandan nga pagya nga “Basta Driver, Sweet Lover” og mahimo na unya kini nga “ Basta Driver, Contact Tracer”.  Nagka-weirdo man ang mga solusyon nga nakab-ot sa kagamhanan.  Baya no!

Maningil sa consumer, wala’y deliver

Matud pa sa tigpamaba sa MCWD, kinahanglan gihapon mobayad ang konsumidor sa binuwan nga bayronon bisan pa man kon wala pa siya’y nakonsumo o diyotay lang iyang nakonsumo nga tubig, kay aduna pa man sila’y aktibo nga koneksyon. Gitauran gani og metro aron masukod ang nakonsumo, pabayron man hinuon ang konsumidor sa serbisyo nga wala niya matagamtam. Dili ba kini maisip nga tulis sa atubang?  Lahi na usab diay ang kahulogan sa MCWD: “Maningil sa Consumer, Wala’y Deliver”. Madahaaan!

Abli na ang mga simbahan

Segun sa rekomendasyon sa IATF, gitugotan na ang pagpahigayon sa mga relihiyosong panagtigom. Ubos sa GCQ, limitahan lamang sa napulo ka manimbahay ang pasudlon; ubos sa MGCQ, pasudlon na ang 50% sa kapasidad sa simbahan.  Gitumong gihapon ang maong lagda sa pagpugong pagkuyanap sa COVID-19 virus.  Bisan adunay misaway sa maong lagda, angayan gihapon nga hangpon sa katawhan ang maong kalambuan. Dili lang isipon nga napulo o katunga ra sa mga miyembro sa simbahan ang maluwas o magrasyahan abi kay mao ra man ang makasulod sa simbahan. Hala no!