Mga pagtuon sa paghuyang sa COVID
Human niulbo ang kalibotanong lalis tungod sa pangangkon sa inilang doktor sa Italya nga nahuyang na, hapit na mawagtang ug busa maisip nang “clinically dead” ang SARS-CoV-2, ang kagaw nga nisangpot sa COVID-19, nitumaw ang laing duha ka nahaunang pagtuon nga nakakita sab og mga timaan sa posibleng pagkahuyang sa kagaw.
Ang buwag nga mga pagtuon sa Estados Unidos ug Singapore pulos nakamatikod og kausaban sa kagaw nga posible nga mohimo ining mas huyang. Apan lahi sa Italyanong doktor ang ubang researchers wa mangangkon nga mawa rag iya ang kagaw.
* * *
Nakaplagan sa mga siyentipiko sa Duke National University sa Singapore ang pagkawagtang sa protina nga mahimong makaiban sa kamananakod ug kabangis sa COVID-19. Nisukwahi ang ilang nahibaw-an sa nahaunang pagtuo nga labihan kalig-on sa kagaw nga magpabilin siyang sama kabangis bisan sa kadaghan na sa katawhan ug kanasuran nga iyang natakdan.
Nadiskubrehan ang pagkawagtang sa protina sa walo ka pasyente sa Singapore gikan sa Pebrero 9 hangtod sa Marso 2, duha ka buwan pa lang human nagsugod og sulbong ang mga kaso sa COVID-19. Samang protina ang nawagtang sa dayong kahilis sa SARS niadtong 2003.
* * *
Ang nawagtang nga protina, ang ORF8, napamatud-an sa pagtuon sa mga siyentipiko sa Germany sa niaging tuig nga maoy nakaingon nga ang kagaw sa SARS nga mas huyang ug ang pagkatap ini nga mas hinay.
Susamang paghuyang sa kagaw ang nakit-an sa buwag nga pagtuon sa mga siyentipiko sa Arizona State University sa usa sa 382 ka swab samples sa mga nataptan sa COVID-19: Nawagtang ang 81 sa kinatibuk-ang 30,000 ka chemical letters sa genome sa kagaw nga nabasa sa bag-ong teknolohiya next generation sequencing.
* * *
Gitataw sa World Health Organization (WHO) ug mga eksperto sa ubang kanasuran nga di pa igong sukaranan ang pagdeklarar nga nihuyang nang kagaw pinasikad lang sa walo ka pasyente sa Singapore ug usa ka pasyente sa Arizona.
Atong paabuton unsa kadaghan ang mga kaso sa labing uwahing pagtuon sa Italya kansang mga detalye gitakdang imantala na sa sunod semana. Hinaot nga masuta na nianang higayona may sukaranan ba si Dr. Alberto Zangrillo sa pagdeklarar nga patay na ang COVD-19 sa Italya.
- Latest
