Goodbye PUJ?

Nabalaka karon ang mga traditional PUJ drivers ug operators nga malahosan na sila nga dili makabalik sa ilang panginabuhian.

Gani bisan nga ubos na sa general community quarantine ang mga dagkong dakbayan sa Sugbo, partikular na ang Cebu City ug Mandaue City, wala pa man nakadagan ang mga PUJ.

Sa executive order nga gipagawas ni Mayor Edgardo Labella ubos sa GCQ, matugotan na nga mabiyahe ang mga PUJ apan sukad sa Hunyo 1 ni isa wala pa mobalik sa karsada kay mahadlok madakpan sa mga operatiba sa LTFRB.

GIkinahanglan nga motuman ang mga pampublikong sakyanan sa lagda sa LTFRB diin mokuha pa sila og special permit ayha makabiyahe ug balik kay naa pa man ta sa state of community quarantine.

Giklaro ni Director Edgardo Montealto nga ang mga bus ang giuna sa pagpadagan, dayon isunod ang mga PUJ pero kadtong modernized PUJ ug ang kataposan mao ang mga karaan o gitawag nga traditional PUJ.

Kini aron maseguro nga dili maghuot ang mga karsada sa daghan nga mga sakyanan kay ang tumong sa pagpabalik sa minimal public transpo nga duna lay masakyan ang katawhan ug dili kini gitumong alang sa kaharuhay o comfort sa mga tawo.

Sa unang adlaw sa GCQ daghan kaayo na stranded nga pasahero kay matud sa tigpamaba sa mayor Atty. Rey Gealon nga 30 porsiento ra sa mga bus nga giingong ipadagan sa metro cities ang nibiyahe.

Dako unta kaayo og ikatabang ang mga PUJ nga mohakot sa mga pasahero kon natagan sila og clearance matud sa mga drivers apan gikinahanglan sila nga mosunod sa lagda kay dako kaayo ang multa kon madakpan.

Isip pagtabang sa mga PUJ drivers nga wala pa kabalik sa panginabuhi gihatan sila ni Mayor Labella gahapong adlawa og tag usa ka sakong bugas human 50 kilos.

Usa ka libo ka mga drivers ang nahatagan sa bugas apan hangtod kanus-a molungtad ang ayuda?

Ang kabalaka sa mga PUJ drivers ug operators nga goodbye na ang ilang mga unit posible baya nga dunay sukaranan kay nakakita na ang ahensya sa gobierno og higayon nga mapatuman sa hingpit ang modernization program pinaagi sa pagwagtang sa mga karaan nga jeep.

Unta kon matinuod man kini mas maayo nga maseguro nga mapahiluna ang mga maapektohan kon duna may lain nga ilang kapanginabuhian o agakon sa kabag-ohan nga ipatuman sa natad sa transportasyon.