Klase gawas sa classroom

Nakadesider na ang Departamento sa Edukasyon pagpadayon gayud sa umaabot school year sugod karong Agosto 24 bisan pa man sa padayong pagsaka sa mga kaso sa coronavirus disease o COVID-19 sa nasud.

Apan adunay mga ginikanan ang nahadlok niini. Kini gumikan sa rason nga basin og mabutang unya sa alaot ang ilang mga anak. Kini ilabina nga walay klaro kun kanus-a mogawas ang bakuna nga pangontra sa maong sakit.

Gani, daghan sa mga ginikanan ang alanganin. Matud nila nga basin kon dili na lamang nila patunghaon ang ilang mga anak karon nga school year kay sa mabutang pa sa sila sa risgo sa coronavirus disease.  Adunay sugyot nga angay hunongon una ang klase karong tuiga gumikan sa padayong pagkuyap sa coronavirus. Ug gani, una nang namahayag si Presidente Rodrigo Duterte nga dili siya makatugot pag-abli sa klase kon walay bakuna nga ma-apud-apud batok sa COVID-19.

Hinuon, katungod usab kana sa mga ginikanan kon modesisyon sila nga dili na lamang nila paeskwelahon ang ilang mga anak niining umaabot nga school year. Dili lalim usab ang kahadlok nga mataptan ang mga estudiyante sa maong sakit.

* * *

Apan saad sa DepEd nga daghan kini og pamaagi aron nga mapadayon ang klase karong tuiga nga walay risgo sa COVID-19. Usa na niini ang pagpahigayon sa klase sa gawas sa classroom. Kini ang gitawag og distant learning.

Tungod sa dakong pag-asenso sa teknolohiya, tinguha sa DepEd ang online classes. Kadtong walay mga internet, adunay pamaagi ang departamento sa pagsabwag og mga tun-anan ngadto sa kabataan. Kini pinaagi sa pagpahigayon og mga educational program sa telebisyon ug radio. Apan dili lamang kana. Makig-alayon usab ang maong ahensiya sa mga local government unit tibuok nasud, ilabina sa mga barangay, sa tinunga niini nga maapud-apod ang mga learning material ngadto sa mga estudiyante. Wala rason ngano nga dili ipadayon ang sunod nga school year. Sayang kaayo ang pagtuon sa mga estudiyante  kun mahunong kini, ilabina nga taas pa ang ilang sagubangon gumikan sa implementasyon sa K to 12 system. Adunay daghang paagi nga dili makumpromiso ang panglawas sa mga estudiyante sa pag-abli unya sa tingklase. Kini sama sa pagpahigayon sa klase gawas sa classroom aron kalikayan ang maaong sakit.