Online enrollment

Ang Department of Education (DepEd) nagpahibawo nga ang pagpa-enrol sa kabataang estudaynte ipaagi sa online o tawag sa telepono. Sa ato pa, walay face-to-face o physical setup ang pagahimuon sa mga magtutongha sa ila unyang pagpa-enroll sugod Hunyo 1.

Gani dinhi sa atong dakbayan, ang online enrolment gisugdan na ahead sa pagpahibawo sa central office sa DepEd, matud ni Cebu City Schools Superintendent Dr. Rhea Mar Angtud.

Ang online enrolment ipaagi sa link sa DepEd-Cebu City- https://depedcebucity.com/. O tawag sa telepono: 032-2551516 aron kahatagan sila sa telephone number sa tunghaan o sa principal nga buot nilang makontak.

Ang tigpamaba sa dakbayan, Cebu City legal officer Rey Gealon namahayag nga ang City Hall mo-assist sa mga tunghaang publiko  pinaagi sa pag-mobilize og kapolisan aron maseguro nga mapatuman ang physical distancing. 

Aduna kitay 69 public elementary schools, 57 public high schools plus under Cebu City division. Busa, lisud ang pagpahigayon sa ko enrolment sa gidaghanon sa mga estudyante  kon i-face-to-face o physical ang pagpa-enrol niining atong panahon karon.

Ang presidente sa Cebu City Public School Teachers’ Association, si Remus Marinas mibutyag nga ila nang gisugdan ang pagtabang sa mga estudyante ug mga ginikanan nga walay  internet access pagpa-enrol sa kabataan.

* * *

So, MECQ na ta dinhi sa dakbayan sa Sugbo gikan sa Hunyo 1 hangtud Hunyo 15, sumala sa rekomendasyon sa Inter-Agency Task Force on Emerging Infectious Diseases (IATF-EIF). Apan si Mayor  Ed Labella mi-apelar nga ibutang kita ubos sa general community quarantine (GCQ).

Ato kining kutluon, sumala sa napatik sa The Freeman: “The task force’s MECQ recommendation for Cebu City was based on the assessment that the city remains a “high-risk area.”

High risk area pa kuno kita dinhi sa dakbayan. Pagkakaron, milapas na’g 2,000 ang nakita nga positibo sa virus. Apan, gamay ra ang nangamatay ug nagkadaghan usab ang naulian sa maayong panglawas o naka-recover.

Ngano man ni? Akong tan-aw, kining atong pagkagahi’g ulo o pagkawalay disiplina maoy hinungdan nga nabutang kita sa pagka-high risk area, kini, despite sa mga tinguha ug paningkamot sa atong dakbayan nga kaminosan ang pagkaylap ug pagpanakod sa virus.

Unsa man ning MECQ? Sumala ni Presidential spokesperson Harry Roque, ania: Strict compliance sa stay-at-home measures. Sa ato pa, magpabilin kitang dili mogawas sa atong mga panimalay, gawas kon dunay tuyo sa gawas sa essential nga mga butang o pag-trabaho sa mga industriya o mga kompaniya nga gitugotan pagpabalik sa operasyon.

Dugang niini: Ang mga high-risk persons (aged 0-20 and 61 or older, pregnant women, people with health risks) makagawas lang sa mga pinuy-anan kon walay laing tawo nga masugo o mapalihug “to obtain essential goods, o sa pagtrabaho sa gitugotan na nga mga kompaniya.

Ug ang exercising outdoors, sama sa jogging ug biking, gitugotan na basta ma-face mask ug mag physical distancing ang nag-exercise.

Dugang pa: Ang mga essential industries sama sa health care, pharmacies, veterinary clinics, food manufacturing ug supply chains, ug mga groceries maka-operate na at full capacity.

So, samtang giulagan ang mga restrictions sa ECQ, apan, mas istrikto na ang pagpatuman niini,  tungod kay mas daghan nang mga tawo ang manggawas gikan sa mga pinuy-anan.