Katapusang yugto

Ugmang adlawa himoon sa among parokya ang katapusang yugto sa pag-apod-apod og mga bugas agig diyotay apan kinasingkasing hinabang alang sa mga parokyano. Kini tungod kay ang matag programa mosugot ta o sa dili dunay katapusan ug kinutoban.

Tumong niini nga makapadayon na pud kita sa laing hugna sa mga buluhaton nga dili  lang makasentro sa pagpanghatag og bisan unsang materyal kon dili usab sa paggiya ug pagpanaw diha sa kinabuhing espiritohanon, labi na ning panahon sa pandemonyo. Kay mag-unsa man tuod kun sa pagkaong lawasnon lang kita busog apan nahimo kitang gutom sa uban pang mga aspeto.

Ning maong katapusang yugto ako mapasalamaton kaayo sa mga parokyano ni San Jose dinhi sa Madridejos, Alegria, Cebu sa ilang walay puas nga suporta ug tabang kanako. Kay bisan pa man sa panahon sa dakong kahagip-ot sila nagpabiling manggihatagon sa gihapon dili lang sa ilang mga bahanding materyal kon dili hasta na usab sa ilang mga kinaadman ug panahon. Kay wa sila magdumili sa paghalad sa ilang kaugalingon makapaambit lamang sa uban nga mas nagkinahanglan.

Wala kini magpasabot nga anaa ang parokya sa advantage nga bahin tungod kay siya nitabang. Hinunoa siya pud baya nagkinahanglan apan bisan pa niini padayon siyang nanlimbasog nga kun bisan unsa nga anaa kaniya mahimong iyang ipaambit ngadto sa uban dili tungod kay siya buot mamahimong ilhon kon dili tungod kay buot niyang tudloan ang kadaghanan nga ang bugtong paagi aron mabuhi ang matag tawo mao man ang pagpuyo diha sa kinabuhing manggihatagon. Atong pamalandongan kining mosunod:

Prayer For Generosity

Dearest Lord, teach me to be generous; Teach me to serve You as I should; To give and not to count the cost; To fight and not to heed the wounds; To toil and not to seek for rest; To labor and ask not for reward; Save that of knowing that I do Your most holy will

Unta mamahimo pa kitang mas manggihatagon pa inig abot sa panahon. Kaninyong tanan! Daghan ug daghan kaayong salamat! Katapusang yugto man tuod kini apan, sa laing bahin, kini na pud ang sinugdanan sa laing hugna sa pakiglambigit diha sa kinabuhi sa gugma!