EDITORYAL - New Normal sa tunghaan

Opisyal nga gipahibalo sa Palasyo nga madayon ang pagbalik sa klase Agosto 24 ug magsugod karong Hunyo 1 ang enrollment sa mga tinun-an alang sa school year 2020-2021.

Kini bisan pa man og una nang namahayag si Pres. Duterte niadtong Lunes sa gabii nga dili siya motugot nga ibalik ang klase kung wala pay bakuna batok sa coronavirus disease (COVID-19).

Daghan ang nihangop sa pamahayag ni Duterte kay ang mga ginikanan nabalaka sa kaluwasan sa ilang mga anak tungod sa hulga sa COVID-19. Si Duterte nanagana para sa panglawas sa mga bata.

Apan kagahapong adlawa, gipahibalo sa Palasyo pinaagi sa tigpamaba ni Duterte nga si Harry Roque nga mahinayon sa Agosto 24 ang pagbalik sa klase, apan dunay daghang kausaban nga kinahanglang sundon tungod sa hulga sa COVID-19.

Ang managsukwahing pamahayag gikan sa presidente ug sa iyang mga sakop sa gabinete nakapalibog ug nakapasagmuyo sa ubang mga ginikanan nga nalipay sa unang pagpahibalo ni Duterte.

Apan dili unta kalimtan sa katawhan, bisan sa mga lunlong mga supporters ni Duterte nga dunay mga tigtambag nga mga eksperto sa ilang mga tahas nga gikuha ang pangulo.

Gisweldohan sila sa gobiyerno tungod sa ilang kahibalo sa trabahong gitahas kanila sa presidente, busa , bisan pa man og may pamahayag na gikan sa presidente dunay mga higayon nga sukwahi kini sa mauyonan sa kadaghanan sa iyang gabinete.

Naa kanunay sa hunahuna sa gobiyerno ang panglawas sa mga tinun-an apan sa samang higayon prayoridad sab ang ilang edukasyon.

Sa pagbalik unya sa klase, makapaabot ang publiko nga ipatuman ang new normal uban sa dakong kausaban sa sistema sa pagtudlo.

Posibleng mubo nalang ang mga oras nga magpundo ang mga bata sa mga lawak saringan ug limitahan nalang sab ang mga adlaw nga kinahanglan silang mosud sa klase.

Kinahanglan lamang nga bisan og mapaubsan nalang sa general community quarantine ang nasud, kinahanglan gyung hugtan ang pagpatuman sa new normal nga kausaban sa tanang oras.