EDITORYAL - Edukasyon isakripisyo?

Dili itugot ni Pres. Duterte nga mobalik sa pageskuyla ang mga tinun-an pangpubliko ug pribadong tunghaan kung wala pay bakuna batok sa novel coronavirus 2019 (COVID-19).

Samtang nakapahupay kini og gamay sa dughan sa mga ginikanan, apan wala pay kasigurohan kun kanus-a madiskubrehan ang epektibong bakuna batok sa maong sakit.

Unsaon naman lang kun lima pa ka tuig ayha pa madiskubrehan ang epektibong bakuna? Maniguwang ang mga kabataang Pilipino pag-estambay sa balay nga way nakat-onan?

Ang kalihim sa DepEd nga si Leonor Briones miingon nga mobalik na sa pagtungha ang mga bata karong Agosto 24. Wala kini maghisgot kun dunay agdon sama sa kun duna nay bakunang magamit apan mipasalig nga adunay mga sistemang ipatuman alang sa kasigurohan sa panglawas sa mga bata ug sa mga magtutudlo.

Apil sa gisugyot mao ang distant education, home visitation ug ang online classes. Kining tanang sugyot dili tanan mauyonan sa mga ginikanan ug bisan mismo sa mga magtutudlo ug mga tinun-an.

Una nini, dili tanang bata adunay access sa internet, ang pag-adto sa mga magtutudlo sa mga balay sa tinun-an daw lisud kaayong buhaton ilabi na kun lagyo ang mga balay ug edaran na ang mga magtutudlo.

Bugtong labing maayong solusyon niini mao ang pagbahin-bahin sa mga adlaw sa usa ka semana, sama sa 3-day classes per week ug bahinon og katulo ka  klase ang adlaw samtang ang ubang adlaw mao ang assignments o projects.

Apan kinahanglang limitahan ra ang gidaghanon sa mga tinun-an sa matag klase aron pagsunod sa social distancing, ug mahimo lang kini kun mokuha og dugang mga magtutudlo ang DepEd. Duna pay bulan sa Hunyo ug Hulyo nga mahimong gamiton sa DepEd ug sa ubang mga magbabalaud aron pangitaan og solusyon nga mabalik na ang klase bisan wala pay bakuna.

Si Duterte igo rang naniguro sa panglawas sa mga bata, apan trabaho sa DepEd ang mangita og solusyon aron mapadayon ang edukasyon sa mga kabataang Pilipino isip ilang mandato.

Husto na kining kadaut nga gimugna sa COVID-19 sa Pilipinas ug dili na unta maapil niini bisan ang edukasyon sa mga bata.