Laing bulilyaso sa SAP
Nagkayamukat ang pag-apud-apod sa unang hugna sa hinabang nga kuwarta sa nasudnong gobyerno ngadto sa labing kabos nga mga pamilya nga nakulban og kaldero kay gitanggong sa ilang kabalayan human sa pagpahamtang sa lockdown sa kinadak-ang bahin sa nasud sa niaging kapin sa duha ka buwan.
Inay gamiton ang mga pagtulon-an sa unang hugna aron kalikayan ang kasaypanan ug mahimong hapsay ang pagpanghatag sa ikaduhang hugna sa social amelioration program (SAP), mag-eksperimento ang gobyerno sa wa pa kasuwayi nga sistema.
* * *
Gipahibawo ni Heneral Rolando Bautista, kalihim sa Department of Social Welfare and Development (DSWD), ang dagkong kausaban sa SAP aron nga di masubli ang kalangay ug pagpalabi sa mga dumadapig sa politika maong ang mga pamilya nga labing tabanganan wa na hinuoy nadawat:
Una, ang mga sakop sa Armed Forces of the Philippines (AFP) nay moapud-apod sa hinabang aron nga na maduhigan og pamolitika sa lokal nga mga opisyal; ug
Ikaduha, makiglambigit sila sa electronic payment platforms aron nga mas paspas nga makaabot sa labing kabos nga mga pamilya ang tag-P5,000 ngadto sa P8,000 nga hinabang.
* * *
Di ni unang higayon nga nipasalig ang retiradong mga heneral nga gitahasan ni Presidente Rodrigo Duterte sa pagpangu sa kampanya batok sa COVID-19 nga mas maayo ang ilang sistema kay sa gipatuman sa sibilyan nga mga opisyal.
Kahinumdom mo sa pasalig sa AFP ug Philippine National Police (PNP) nga silay moduma sa contact tracing sa tanang posibleng natakdan sa COVID-19 ginamit ang sistema sa pagpangespiya? Nagpabilin pang pasalig kay ang local health workers man gihapoy nagkapuliki sa contact tracing hangtod karon.
* * *
Unsaon man pagtultol sa mga sundawo ang kabalayan sa nalista nga labing kabos nga mga pamilya nga mas suhito man sila sa kabukiran nga nahimutangan sa ilang gikasangka nga mga rebeldeng komunista ug mga terorista sa Mindanao kay sa mga patag sa labing dagkong dakbayan ug kalungsoran.
Kon karon pa sila makiglambigit sa electronic payment platforms, unsaon man paglaktod ang pila ka semana o buwan nga gikinahanglan sa pagpanglista sa mga molupyo nga kinahanglan nga dunay cellular phones o internet access aron makasud sa mga transaksiyon nga nagsandig sa labing bag-ong mga teknolohiya?
* * *
- Latest
