Gikan sa kayo

Nindot baya gyud nga mamahimong maayo alang sa uban. Gani ang kaayo maoy bugtong paagi kun giunsa nato paggamit ang atong kagawasan.

Ang kagawasan nga nahimong mahinungdanong kabahin sa atong pagpakabuhi. Pagpakabuhi nga maoy hinungdan kun nganong hangtud karon ania pa kita dinhi.

Apan wala kini magpasabot kay nia man kita dinhi, mabulokon na gyud kaayo ang atong kinabuhi. Apan dunay mga higayon nga ang kaayo dili man mabaslan og kaayo. Ang kabuotan bugtian man og kadautan ang pagkamatinud-anon bugtian man og pagluib. Ang pagkamanggihatagon bugtian man og kahakog.

Ingon ini gyud ang kinabuhi. Daghan sa mga tawo ang nahimong mapasagaron ug dili maantigong mogamit sa gahum sa ilang pagpili sa paghimo og maayo ug pagminatarong sanglit ang uban kanila nigamit man niini sa pagdinautan.

Matang sa binuhatan nga gitahod gihapon sa Dios. Kay giisip man niya ang matag tawo ingon nga gawasnon ug ang maong kagawasnon maoy naghimo nuon sa matag tawo nga mopaturakas sa iyang kaugalingon.

Apan lahi usab ang pamaagi sa yawa. Kini tungod kay ang yawa dili man maantigo motahod sa kagawasnon sa tawo. Iyang gipaningkamotan nga mamahimong mas maulipon niya ang maong tawo. Ug human niya siya maulipon himoon niyang mag-antos ang tawo sa hilabihan.

Mas maayo pa ang tawo nga gikan sa dautan apan nahimong maayo kaysa tawo nga gikan sa maayo apan nahimong dautan. Kay ning paagiha, nahimo man siyang mas mograbe pa man nuon. Dili lalim ang magpuyo sa pagbinuotan. Kay ang pagbinuotan usahay pagaisipon man nga complete deviant sa giisip nilang naandan.

Ang pagkadautan, bisan pa man kun duna kay maayong katuyoan, ang dili gihapon makatarunganong pamaagi sa pagkab-ot og bisan unsa nga giisip natong maayo ug balaanon. Giingon pa nila nga the end does not justify the means. Apan dunay mga higayon nga mas mohari ang kadautan dili tungod kay ang tawo buot mamahimong dautan.

Ang pagkadautan mao man ang giisip nilang bugtong praktikal nga paagi aron mabuhi ang usa ka linalang nga naningkamot nga mamahimong molatas ning walog sa mga luha.

Mao nga dunay mga tawong maayo ning panahona nga maantigong motikas labina sa pagbinahinay sa SAP nga hinabang. Dunay uban nga angayang tagaan apan wa kahatagi ug dunay di angayang hatagan apan maoy nabuhong sa tanang matang sa hinabang.