Herd immunity
SAKSAK SINAGOL - Lucky Malicay (Banat) - May 25, 2020 - 12:00am

Didto sa nasud sa Sweden sa Europa, ang kagamhanan adunay dako ug talagsaon nga paagi sa ilang pagpakigkumbati sa coronavirus disease, kansang kagaw ang grabe nga mikamang sa tibuok kalibotan karon.

Kining maong ilang pangontra batok sa COVID-19 dili usa ka bakuna, tambal o unsa man nga ipangtuob nga sarang ug epektibo kuno nga ikasakbang sa maong makamatay nga sakit. Kini ang gitawag og herd immunity.

Unsa man kining herd immunity? Ug epektibo ba usab kini batok sa kabangis sa COVID-19 nga miigo na sa kapin sa lima ka milyon ka tawo ug mipatay na sa halos 350,000 ka kinabuhi sa kalibotan sukad sa Disyembre sa niaging tuig.

Ang herd immunity maoy usa ka estratehiya diin ang katawhan o ang dako nga populasyon sa usa ka lugar mahimong ma-expose sa usa ka kagaw o virus aron sila mahimong immune usab niini ug makasugakod sa kadugayan.

Didto sa Sweden, kabahin sa tumong pagkab-ot sa herd immunity batok sa coronavirus, dili estrikto ang social distancing bisan kun gi-promote kini. Gani, walay community quarantine didto ug gitugotan ang mga public gathering nga dili momenos sa 50 ka tawo.

Dugang pa niini, padayon nga abli ang mga restaurant, salon, bar, gym ug uban pa didto. Abli usab ang mga tulonghaan, apan sirado kadtong mga anaa sa ubos nga level. Sa laktod, padayon ang dagan sa ilang ekonomiya taliwala sa COVID-19.

Gituyo kining tanan sa kagamhanan didto aron pagkab-ot sa ilang tinguha nga sa dili madugay mahimong immune na ang populasyon sa maong nasud gikan niining maong klase sa coronavirus. Hinuon, kini maoy labing una nga klase sa eksperimento batok sa COVID-19 sa kalibotan.

Ambot kun molampos ba kining maong estratehiya. Sa atong nasayran, usa ang Sweden sa mga nasud sa Europa nga grabeng naapektohan sa coronavirus disease. Gani, adunay halos 33,000 ka kaso sa COVID-19 didto ug halos 4,000 niini ang namatay.

Apan ang mg eksperto miingon nga palpak kuno ang herd immunity program sa Sweden. Kini tungod usab sa dakong mortality rate didto gumikan usab sa halapad mga inpeksiyon mugna sa lugak nga kampanya batok sa maong balatian.

Hinuon dako ang kumpiyansa sa kagamhanan sa maong nasud nga ilang makab-ot ang herd immunity didto sa umaabot nga mga semana. Ug kun unsa ka epektibo ang ilang eksperimento, ato lamang paaboton.

HERD IMMUNITY
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with