Ad5-nCoV, mRNA-1273 ug ChAdOx1-nCov19
Sa kapin sa gatos ka kandidato nga bakuna batok sa Covid-19, ug sa walo ka kandidato nga bakuna nga nilampos sa pagpanalipod sa mga hayop gikan sa kagaw ug karon gidapat na sa gatosan ka tawo, dunay tulo nga giisip nga maoy labing dako og kahigayonan nga makabadlong sa sakit:
Ang bakunang Ad5-nCoV nga hinimo sa CanSino Biologics sa China nga maoy labing unang nakasud sa human trials niadtong Marso;
Ang bakunang mRNA-1273 nga hinimo sa Moderna sa Estados Unidos nga nakamugna og antibodies sa mga pasyente sud sa 15 ka adlaw; ug
Ang bakunang ChAdOx1-nCov19 nga hinimo sa Oxford University sa Britanya nga ni-abante na sa clinical trials nga maglambigit sa kapin sa 10,000 ka tawo.
* * *
Nipahibawo ang Cansino Biologics nga nakamugna og panagang sa Covid-19 ang 108 nila ka pasyente, nga nagpangedaron og 18 ngadto sa 60 ug way Covid-19, human hatagi og huyang nga bersiyon sa kagaw.
Human sa 28 ka adlaw, katunga sa mga pasyente nakamugna og “neutralizing antibodies” nga makagapos ug maka-inutil sa kagaw aron nga kapugngan sa pagguba sa baga ug ubang bahin sa lawas.
* * *
Napanid-an nga labing kumon nga daotang epekto ngadto sa mga pasyente mao ang gamayng sakit sa panit nga gitusokan, mubo nga hilanat, pangapoy, labad sa ulo ug pagpanakit sa kaunoran.
May siyam hinuon ka pasyente nga gihilantan nga may temperatura nga 38.5 degrees celsius ug may usa ka pasyente nga taas ang hilanat, nangapoy ang lawas, naglisod sa pagginhawa ug nanakit ang kaunoran. Nawa ra sab hinuon ang dautang epekto human sa 48 ka takna.
* * *
Niangkon ang mga tigpasiugda nga ang pasiunang kalamposan sa pagmugna og antibodies, sama sa nahimo sa ubang mga kandidato nga bakuna, di mo-garantiya nga ang Ad5-nCoV makapanalipod na sa katawhan gikan sa Covid-19.
Gisugdan na sa Cansino Biologics ang mas dako nga ikaduhang hugna sa pagtuon sa ilang bakuna nga naglambigit sa 500 ka pasyente.
May mga boluntaryong niapil sa pagtuon nga kapin sa 60 anyos, nga apil sa giisip nga labing nameligro sa sakit.
Panid-an wa bay daotang epekto nga masinati ang mga pasyente sud sa unom ka buwan human sila bakunahi.
* * *
- Latest
