Isangyaw ang maayong balita

Mayo 24, 2020: Domingo sa pagsaka sa Ginoo (World Communications Sunday)

Mga Pagbasa: Buh. 1;1-11/Sal. 47/Ef. 1;17-23/Mt. 28;16-20

Kini gyud ang gibilin nga pahimangno ni Jesus ngadto sa iyang mga tinun-an samtang wala pa siya bayawa ngadto sa langit.

Gani nidugang pa siya sa pag-ingon: bunyagi sila sa ngalan sa Amahan ug  sa Anak ug sa Espiritu Santo! Ug ang iyang pasalig ngadto kanila sa iyang pag-ingon:

“Ug hinumdomi ako magauban kaninyo sa kanunay hangtud sa katapusan sa Kalibutan!”

Tukma pud nga ning panahon sa Pandemonyo, nahimong mas nikuyanap ang negatibong emosyon nga mahimong hinungdan sa depresyon.

Mao nga unta ang isangyaw rong mga higayona mga butang maayo ug dili ang dautan ug negatibo.

Gumikan ning maong trahedya nga atong nasinati karong mga higayona, kita nahimong limitado sa atong panglihok lihok.

Gani, nahimo man kitang gidasig sa gobiyerno nga magpabilin lamang sulod sa atong tagsa tagsa ka mga panimalay ug dili magpatuyang sa atong gibati labina nga dunay mga kaso sa wuhan virus bisan asa.

Ang atong pagsaulog sa Santos nga Misa dili na matawag natong normal ug physical.

Kini tungod kay kasagaran niini ato namang gihimo nga online ug virtual. Ambot lang kaha kun molahutay ba kini kay basin moabot ang panahon nga ang via live streaming mohikaw na ning maong mga kalihukang espiritohanon.

Sa laing bahin, kun ugaling mahanaw na ning maong pandemonyo ang kinaiya sa matag tawo nga Kristiyano ang mahalingan pa ba kaha og igong kasibot ug kadasig ilabina sa pagpaduol sa mga sakramento? Labina kun ang new normal nga virtual mao na lang ang ilang naandan?

Si Jesus bisan pa man nibiya kanato apan wala niya biyai ang iyang mga tinun-an ug kita nga mga ilong tuwapos.

Iyang gipadala ang Balaang Espiritu nga maoy naghatag kanato ug kainit diha sa pagtuo, kahupayan panahon sa atong kalisdanan, kalipay panahon sa atong kaguol. Ang iyang presensiya maoy assurance nga ang bisan unsang nasugdan ni Jesus mapadayon gyud diha sa atong panahon karon.

Kay bisan pa man kun nahimong sirado ang tagsatagsa ka mga church buildings nahimong buhi man usab ang simbahan diha sa tagsatagsa nato ka mga panimalay ug bisan ang coronavirus dili man makabuntog niini.