Di na lage manugal, pustaanay pa!

Adunay 18 ka tawo ang nadakpan atol sa gipahigayon nga anti-illegal gambling nga pagpangronda nga gihimo sa CIDG 7 sa Negros Oriental ug sa Metro Cebu Field Unit.  Segun sa CIDG, ang mga nadakpan nagduwa og “tong-its” ug “piyat-piyat” ginamit nga panugal ang ayuda nga nadawat gikan sa SAP ug sa UCT. Karon nga nadakapan na ang maong mga sugarol, mangayo dayon kini sila og pasaylo, dayon mosaad nga dili na sila mousab pagpanugal.  Agi ug pagmatuod sa ilang saad, makigpustaanay pa kini sila.  Pagkatoytoy!

Sala ni juan, dahig si pedro

Adunay 43 ka mga Mayor sa tibuok Pilipinas, diin lima niini gikan sa Central Visayas, ang pagahatagan sa DILG og “Show Cause Order” tungod sa giingon nga kalangay, hinungdan sa ubos nga accomplishment sa pagpangpanghatag sa ayuda sa SAP.  Pamolitika ug kakulang sa panglantaw ang sagad nga hinungdan sa kalangay.  Ang kagamhanang lokal ang mo-esplikar sa kakulangon sa sakto ug hapsay nga lagda sa pagpanghatag nga angay unta gilatid na daan sa nasudnong kagamhanan sa wala pa ipanghatag ang ayuda.  Sa sala ni Juan, si Pedro ang napahimungtan.  Kadakong baligho!

Nakigduwa og dakop-dakop

Nabalaka na karon ang mga BHW sa Mambaling nga na-assign sa Barangay Isolation Center sa maong barangay tungod sa giingon nga harassment nga ilang nasinati sa mga pasyente sa COVID-19 nga nahimutang sa maong sentro kay giingon nga mangpanggukod ug dayon mang-gakos dayon sila sa mga BHW.   Inay magpalayo sa kadaghanan ang pasyente aron dili makatakod, nakigduwa na man hinoon og dakop-dakop ang kanahan sa mga nag-atiman kanila.  Makaburyong gayod diay ang sakit nga COVID. Faeetz!

Dili makaputi sa labada

Mga siyentipeko sa Australia nagkanayon nga nakakaplag ug nakamugna sila’g matang sa microalgae nga makatabang sa mga coral reefs kon kagasangan sa pagbatok sa pagkagun-ob ug pagkatun-as pinaagi sa paghimo sa kagasangan nga ‘heat resistant’ nunot sa nagkataas nga temperatura sa dagat nga maoy hinungdan nga maluspad ang mga gasang kon tanggapa.  Dili magmaya ni’ng maong balita ang mga Tatay nga labandero kay dili man makapaputi sa labada ang maong imbensyon.  Matud pa sa akong silingan, “Inyoha na lang na”. Madahaan!

The law is the law…unless!

Adunay pipila ka mga kadagkoan sa kapolisan ang mipadayag sa ilang pagsuporta ngadto kang NCRPO Director Debold Sinas nunot sa kontrobersya nga iyang nasinati mahitungod sa pagsaulog sa kasumaran sa iyang adlaw’ng natawhan nga giingon nga nakasupak sa lagda sa ECQ.  Bisan pa man sa maong mga suporta, naga-atubang gihapon si Director Sinas og imbestigasyon.  Ang balaod, bisan sakit usahay, balaod gayod nga angayan ipatuman.  Gawas lang kuno kon adunay birthday sa General.  Hala no!