Artificial Intelligence COVID-19 prevention

Sa nahitabong krisis mugna sa COVID-19 daghan kaayo ang kabag-ohan nga napugos ang mga tawo sa pagsagop kay wala may kapilian.

Ang abnormal kaniadto nahimo na nga new normal karon kay mao naman gyud ang realidad.

Sa ka paspas sa panghitabo wala gyud mapangandaman unsaon nato sa pag handle nga pulos trial and error hangtod mahaduol na sa perfection.

Tungod kay delikado man kaayo ang atong kontra nga dili makita gikinahanglan nga mohimo gyud og inovation ang mga tawo aron makasagang man lang sa kagaw.

Ang automated devices maoy giduso karon sa Cebu City nga gamiton sama sa Artificial Intelligence Facial Recognition and Thermal Scanner.

Unang gibutang sa buhatan ni Konsehal Junjun Osmeña sa Cebu City diin gimontar dapit sa pultahan ang naasoyng device.

Kung mosulod ang tawo gikinahanglan nga mohimo gyud sa protocol sama sa pagsul-ob sa mask.

Ang talking A.I. device mosita sa mga tawo nga magsul-ob sa mask ayha makasulod sa opisina.

Mahibaw-an usab ang kainiton o temperatura sa lawas tawo nga mosulod sa dapit. Mas accurate kuno ni itandi sa mga kahimanan nga gigamit sa ubang buhatan sa gobiyerno.

Ang Cebu City ang unang migamit sa modern technology human naay nagpagamit nga kompaniya sa kahimanan.

Wala na kinahanglana nga naay tawo nga mopusil og thermal gun sa agtang diin malikayan ang posibleng transmission sa kagaw.

Matud ni Konsehal Osmeña nga mahimong kabahin na sa atong kinabuhi ang kabag-ohan mga gimugna sa COVID nga gitawag nga new normal busa gamit kaayo ang ingon niini nga mga devices.

Filipino ang naa sa likod niining naasoyng proyekto nga angayan usab ikapasigarbo, mahal man tan-awon apan ipatitigbabaw niini ang fair treatment sa mga tawo, madato o mapobre nga mosulod sa usa ka buhatan sa gobierno walay special treatment kay kon mosupak sa mga lagda aw dili gyud kasulod.

Unsa dili lang pud isalig sa mga tawo ngadto sa mga instrumento ang safety kon dili sa matag usa kanato mohimo og pagpakabana nga maghatud og kaluwasan gikan niining problema nga giatubang natong tanan.