Tungod sa kwarta, COVID nakalimtan

Akoy gipangilohan nga nagtan-aw sa mga tawo nga nagdasok atol sa pagpang apud- apod sa ayuda gikan sa Social Amelioration Program SAP sa Dakbayan sa Lapu-Lapu.

Kini tungod kay nakalimtan naman ang social distancing, panit sa panit gyud ang sitwasyon sa mga tawo nga nagdikit na ang ilang mga lawas, nag abot ang isig ka ginhawa sa kahuot nila.

Ngano man tungod lang sa 6 mil nga ayuda makalimtan na ang safety gikan sa coronavirus nga nag atang nang daan nga motapot sa mga tawo nga gahi og ulo?

Nasobrahan ra sa ka excited nga modawat sa salapi o mahadlok nga mahutdan sa kwarta? dili man seguro kay nakalista naman busa segurado na nga makadawat gyud sila.

Angayan hinumduman sa mga tawo nga nasinati nato ang kalisod karon tungod niining atong kaaway nga dili makita busa angayan gyud unta kitang mag matngon.

Ang P6 mil nga makuha gikan sa SAP o sa UCT dili gyud kaigo simbako kon mataptan sa covid kay minilyon ang pwedeng gastohon. Masabtan man nato nga gipanggutom na ang mga tawo kay wala na lagi trabaho apan dili nato iamong ang atong kaugalingon ug ang atong pamilya nga ipaon nalang nato sa kagaw aron lang makuha ang kwarta.

In fairness sa kagamhanan mihimo na sila sa ilang responsibilidad gikan sa pagpahimangno sa katawhan ngadto na paghatag og ayuda.

Apan sa katawhan pa gihapon magdepende ang kaluwasan sa matag usa kanato kay kita ang mas nasayod sa angayan himoon kay sa ubang tawo bisan pa ang gobiyerno.

Sa Dakbayan sa Lapu-Lapu lang si Mayor Ahong Chan gipatolan na ang pag tiktok aron masabtan sa mga tawo ang angayan nga himoon apan daw wala hatagi og bili sa mga oponganon nga gahi og ulo. Dili mahimo tagsa tagsaon pagdukol sa mayor ang ulo sa mga tawo aron lang mopatoo kay sila mismo nasayod na niini pero dili lang gyud mopatoo.

Ang gobiyerno ra ba dayon ang basolon kun unsay mahitabo, pastilan naman lang gyud.

Simple lang ang himoon mopatoo lang gyud sa protocol sa atong gobierno mismo sa kaugalingon natong judgement sa mga panghitabo kay kita ang responsable sa kaugalingon natong kaluwasan.