New normal

Dili mahimong dili mosukol ang tawo sa mangtas nga kagaw (COVID-19). Kinahanglang makig-away gayod aron dili hingpit malus-ag ang naapektohang ekonomiya sa tibuok kalibotan nga kalus-agon na. Bisan unsa kadako sa pundo sa salapi nga anaa sa panudlanan, kon gastohon kini kada adlaw nga wala nay bisan usa ka sentimo ang bag-ong misulod, mahurot gyod tanan.

Busa, nakahukom si Presidente Rodrigo R. Duterte nga sugod Mayo 1, 2020 tangtangon na niya ang Enhanced Community Quarantine (ECQ), ius-os ngadto sa General Community Quarantine (GCQ) ang mga piniling lugar nga giisip low risk to moderate risk o mga dapit nga wala kaayo madutli sa COVID-19, diin hinayhinayan na niyag paabli ang pipila ka dagkong balay-patigayon ubos sa New Normal nga paagi.

Hinuon, ang pagsul-ob og facemasks sa publiko ug physical distancing nga adunay usa ka metrong gilay-on hugtanon gihapong ipasunod. Usab ang curfew ug uban pang naandang gihimo panahon sa ECQ magpadayon. Mao nga gitawag og Bag-ong Naandan (New Normal).

Paghugpa sa COVID-19, tanang balay-patigayon, gawas sa mga piniling sectors nga maghatag og serbisyo sa inadlawng panginahanglan sa katawhan, gipasirhan sa gobiyerno sugod sa miaging Marso 16 didto sa Luzon, sa ato Marso 17.

Daghan ang nawad-ag trabaho. Daghan ang naputlag negosyo. Ug daghan ang nagyawyaw sa giatubang nga kagutom tungod sa pag-implementar sa ECQ.

Gidili sa maong balaod, ang paggawasgawas sa mga balay. Tanan, kinahanglang magpuyo sa tagsatagsa ka panimalay. Kutob sa mosupak dakpon.

Ug kay ang unang giplanong adlaw sa paglibkas niini, molungtad pa man hangtod sa ikaduhang semana sa Abril, mipagawas og binilyong salapi ang Malakanyang aron iapod-apod ngadto sa tanang pobreng pamilya.

Mando sa pangulo ngadto sa tanang taga Local Government Units nga ihatod ang maong hinabang sa tagsatagsa ka panimalay aron dili na manggula sa balay ang mga tawo.

Butang, nga wala gyod hingpit matuman. Kay daghang pobre ang walay nadawat.  Hangtod karon.

Sa Luzon, nag-GCQ na ang pipila ka lugar ubos sa New Normal. Kon motuman lang ang tanan niini, molig-on ang atong puwersa sa pagpakig-away sa COVID-19.

Ug usab, hinayhinay natong matabangan ang gobiyerno pagpabangon sa nagtakilid na natong ekonomiya.

Kita dinhi sa Sugbo, ready na ba?