Strategic mass testing

Dakong bintaha kining strategic mass testing sugod karong adlawa sa mga urban cities sa Metro Cebu nga gipasiugdahan sa Office of the Presidential Assistant for the Visayas (OPAV) ug Department of Health (DOH).

Ang proyekto nakab-ot atol sa usa ka meeting sa niaging semana nga gipahigayon ni OPAV chief Secretary Michael Dino, Cebu City Mayor Edgardo Labella, Mandaue City Mayor Jonas Cortes, Lapu-Lapu City Mayor Junard Chan ug ubang stakeholders. Ang mass testing sa tulo ka dagko nga dakbayan sa Metro Cebu kabahin sa “Project Balik Buhay,” usa ka programa nga gimugna ni Secretary Dino ug sa OPAV uban sa pagpakigtambayayong sa DOH ug mga local government units. Ang maong “Balik Buhay” program nag-umol og mga paagi nga maibsan ang mga problema nga motumaw sa inanay unya nga pagbalik sa normal sa sitwasyon human sa enhanced community quarantine. Hinuon gikinahanglan gayud ang mass testing dinhi sa Sugbo, ilabina sa mga siyudad sa Sugbo, Mandau ug Lapu-Lapu. Kini aron masuta gayud kun unsa ka dako ang problema nga dala sa Coronavirus Disease o COVID-19 dinhi. Nagkadaghan ang kaso sa maong makamatay nga sakit dinhi sa Sugbo. Ug usa kining strategic mass testing ka paagi pagsuta kun asa nga aspeto sa kampanya batok sa COVID-19 ang angay nga hingusgan sa gobiyerno.

Matud pa ni Secretary Dino: “There is really hope for everyone with this plan.” Kini isip usab pagpangandam sa kagamhanan, katawhan ug ubang sektor sa dakong transisyon inig lurang na unya sa virus nga miigo na og gatusan dinhi sa Sugbo.

* * *

Maayo usab ang desisyon ni Cebu City Mayor Edgardo Labella paglibkas na sa liquor ban sa dakbayan. Ang iyang lakang usa lamang sa timailhan sa hinayhinay nga pagbangon sa ekonomiya sa atong dakbayan. Ang paglibkas sa liquor ban dako usab og tabang ngadto sa sektor sa mga magpapatigayon niining panahon nga nikubos ang ilang kita gumikan sa enhanced community quarantine tungod usab sa paghapak sa COVID-19 dinhi. Nagpasabot usab kini nga makapalit na ang katawhan og ilimnong makahubog sa mga department store ug ubang tindahan. Apan gidili ang pag-inom sa publiko. Adto lamang hinuon sila makainom sa ilang pinuy-anan.

Hinuon, niadtong gipatuman pa ang liquor ban sa siyudad, mituman ang tanan. Ug wala kita makasugat og mga problema niini kay mikooperar ang katawhan.

Karon, hinayhinay na nga mibukal ang economic activity sa siyudad. Niining paglibkas sa liquor ban, dili ikalimod nga dako usab kini og tabang ngadto sa gagmay nga mga tindahan aron sila maka-survive niining maong krisis.