Pagkamagbalantay ning panahon nga bantayanan kayo

MAYO 3: Ikaupat nga Domingo sa Pasko sa Pakabanhaw

(Domingo sa Maayong Magbalantay/ World Day of Prayer for Vocations)

Mga Pagbasa:14a-36-41/Sal. 23/1 Ped. 2;20b-25/Jn. 10;1-10

Bisan unsa na lang masulod sa akong hunahuna masanong ko lang ang panginahanglang espirituhanon sa akong mga parokyano. Gikan sa live streaming nga Misa, Pagbendita sa mga Lukay nga way tawo, pagpanghatag og mga relief goods kuyog sa mga boluntaryo, ug bisan unsa na lang gyud ang gihimo sa pamasin nga mahatagan lang gyud og igong pagtagad ang halapad nga sibsibanan sa mga karnero nga gisangon kanako. Gani dunay mga higayon nga malisud alang nako ang pagkatulog labina kun maghisgot kita og sustainability sa parokya labina sa mga sweldohanan sa mga katawhan nga nitampo ug nitabang usab aron mamahimong magmalampuson ang tanan alang sa kahimayaan sa Dios.

Sa akong personal nga pagpatidlum nakita ko ang akong kaugalingon ning mosunod nga kategoriya:

1. Ang dakong tinguha nga makahimo og kaayohan ning panahon sa kalibutanong krisis gumikan ning virus. Dili lang gyud tuyoon nga bisan gani ako magpakanaa may mahatag lang gyud unta. Usahay ang akong panghunahuna anaa sa mga butang o konsepto nga malisud dawaton sa kasamtangan apan praktikal ug makahuloganon man pud kun tubayan.

2. Ang pagpangutana kun asa kutob ang scope sa akong pagkapari kutob lang ba sa mga Misa o mga sakramental nga mga buluhaton labina ning panahon diin nahimong halayo physically ang Sagrada Eyukaristiya?

3. Ang pag-entertain sa dakong posibilidad nga mohimo og mga innovations mapalig-on lang ang pagtuo bisan kun kini mamahimong deviant sa mga naandang balansayon sa atong tinuhoan?

4. Ang pagpangutana nga sa relief goods lang ba gyud kutob ang atong pagtabang?

Kini ug uban pa ang mga pangutana nga akong gihunahuna ug akong gidamgo nga madungog ug mahatagan og katin-awan. O basin ang kasinatian na mismo ang mohatag sa tubag sa akong mga pangutana.

Personal mente ako nahigmata nga malisud nga buhat kining maong magbantay ning panahon nga balantayan.

Pabiling tak-op ang mga balay alampoanan ug gani gihugon hugon nga himoon kini sulod sa napulog walo ka mga buwan. Kay lagi tinguha niini nga tak-upan sa pipila ka mga nagpaka ginoo ang simbahang tinukod ni Cristo.Dasig lang maoy gibutang nako sa akong alimpatakan ug kun asa ug hain kutob ang akong pagpaningkamot mahatagan alng og igong kalig-on ug paglaum ang matag parokyano ako pud unta mamahimong malipayon bisan pa man ning maong maldisyon!