Wa’y ginikanan nga kasumbongan

Tungod sa daghang reklamo gikan sa mga masuk-anon nga mga senior citizens, mihangyo si Senator Sonny Angara nga hatagan sila og exemptions sa panahon sa ECQ labi na kadtong mga seniors nga nagtrabaho pa ug produktibo gihapon nga miembro sa katilingban.  Angayan nga paminawon ang hangyo sa mga senior citizen kay sa panahon nga sila mag-inusara ug may problema, dili na ra ba intawon sila makapanawag sa ilang ginikanan aron magdangoyngoy ug mosumbong sa ilang suliran.  Saoonz!

Labor Day nga walay labor

Mga sakop sa usa ka kahugpongan sa mamumuo mipahigayon og lihok-protesta didto sa Rodriguez, Rizal bisan pa man sa gipatuman nga ECQ.  Gituman hinuon nila ang social distancing, samtang gipaabot nila ang ilang yangongo alang sa kaayohan sa mga mamumuo.  Lihok-protesta ra ba gyud ang nahibaw-an niining maong grupo pagpadangat sa ilang mensahe bisan pa man ni’ng panahon sa ECQ?  Matud pa sa akong apohan, “Labor Day man kaha, ngano di man ta manarbaho? Labon og namagol mo, sige laman mo’g paso-paso”.  Bitaw no!

Lagda sa waste management

Mipasalig si DOH Director Jaime Bernadas nga dili angayan mabalaka ang katawhan sa ipahigayon nga mass testing nga sugdan karong Mayo 4, 2020. Giklaro nga bag-ong syringe ang gamiton matag tawo ug ilisan usab ang gloves human maka-testing og lima ka tawo basta i-sanitize lang kini matag human og gamit.  Kulang ba gayod diay ang gamit alang sa mass testing nga daw gisalindot na man sa DOH ang tinud-anay nga protocol bahin niini? Mora man hinoon og lagda na sa waste management ang gigamit nga mao ang REDUCE, RE-USE, RECYCLE.  Hala no!

Babag ang kahakog ug kasina

Gikataho nga ang mobile market nga gipasiugdahan sa kagamhanan sa dakbayan sa Sugbo wala makapaninda didto sa Barangay Inayawan tungod sa pagbabag sa mga vendors sa Inawayan Public Market.  Ang kapakyas sa pagpahigayon sa mobile market nakapadismaya sa mga lumolupyo nga milinya na unta aron mangompra.  Kon adunay kompetensiya sa patigayon, ang konsumidor unta ang mabulahan.  Apan ang kahakog ug kasina sa tawo mao gayod ang babag sa kabulahanan. Faeetz!

Naglisod si kap pagpatuman

Adunay kapin kon kulang 100 ka mga Kapitan sa Metro Manila ang nahatagan og show cause orders tungod sa giingon nga kapakyasan nila pagpatuman sa lagda sa ECQ. 

Mahimong mapsakaan ug kasong administratiba ang mga kapitan kon mapamatud-an nga wala sila makapatuman sa ECQ.  Duha ra ang posible nga rason ni Kap ngano nga naglisod pagpatuman: 1. Gahi jud og ulo ang katawhan; ug 2.  Hadlok si Kapitan nga di na botohan sunod eleksyon.  Madahaaan!