Palpak sa IATF

Makapanlimbawot sa balhibo ang dakong trahedya unta nga mahitabo kun gipasagdan sa mga opisyal sa Sugbo nga yanong mosulod ang kapin sa 200 ka mga OFWs nga nangabot dinhi sa Sugbo gikan sa Manila niadtong Martes.

Kini human masuta nga positibo ang 13 nila sa COVID-19. Kun gitugtan pa ni Gobernador Gwendolyn Garcia ug ni Cebu City Mayor Edgardo Labella nga diretsong mopauli sa ilang mga pinuy-anan ang maong mga OFW tungod kay maoy mando sa Inter-Agency Task Force, labing siguro natakdan na ang ilang mga pamilya ug mga higala.

Salamat nga miinsister gyud si Gobernador Garcia nga ipaubos sila sa 14 ka adlaw nga quarantine ug subling himoon ang test pagsiguro nga wala sila magdala og kagaw.

Silang tanan gipaubos na sa quarantine didto sa Manila ug nagnegatibo na sab sa gihimo nga Rapid Diagnostic Test (RDT).

Gitugotan sila sa IATF nga makapauli apan wala moklaro og pakig-alayon sa lokal nga kagamhanan. Tiaw mo kadako sa ilang palpak?

Kun nahinumdom mo nasuko ang gobernador niini tungod kay awahi na siyang gipahibawo sa Overseas Workers Welfare Administration (OWWA) sa ilang pag-abot.

Matud sa gobernador nga dili pa gyud pormal ang gihimong pagpananghid tungod kay giagi lang sa messenger.

Bisan kontra sa iyang kabubut-on way nahimo ang gobernador gawas sa pagdawat nila sanglit mando sa IATF.

Apan wala gyud mokumpiyansa si Garcia gipausab niya og quarantine ug gi-test gamit ang laing matang sa test nga mas kasaligan—Polymerase Chain Reaction kon PCR.

Ug wala masayop ang gobernador sa iyang gihimo tungod kay nasuta nga 13 nila positibo gyud sa COVID-19—lima taga probinsiya samtang walo taga dinhi sa dakbayan sa Sugbo.

Hinaut na leksiyon ang IATF niining maong hitabo ug ang mga nasudnong ahensiya sa gobyerno. Dili angayang magbuot mo og inyo nga dili mananghid og tarong sa LGU.

Maayo gani kay makamao ug dunay baruganan ang gobernador sa Sugbo. Ang uban nga LGU nga nakabaton og lider nga dili makamao mobarug sa iyang katungod, mag-unsa naman lang ang katawhan?

Ang maong hitabo nakamugna sab og seryosong pagduda kun epektibo ba gyud ang RDT nga paagi sa testing.

Sugod ugma ilusad na ra ba sa mga dakbayan sa Sugbo, Mandaue, ug Lapu-Lapu ang massive strategic testing isip kabahin sa Balik Buhay Project.

Apan ang paagi sa ilang testing mao ang RDT tungod kay mas dali itandi sa PCR.

Kun mao nga dili kasaligan ang maong paagi, dili ba mas delikado hinuon nga makamugna ni og sayop nga kumpiyansa sa mga tawo nga natakdan diay sa kagaw?