“Makalibog ang gobyerno”

Mipasidaan ang Department of Health niadtong mga tawo nga mogamit Fabunan Antiviral Injections nga mahimong mag-atubang og kaso tungod kay wala pa marehistro sa FDA ang maong tambal. Makalibog ang maong pamahayag sa DOH.  Niingon ang Presidente nga iyang hatagan og premyo kadtong makadiskubre sa tambal batok sa COVID.  Kon motuman pud ta sa awhag sa Presidente unya maningkamot kita nga makadiskobre sa tambal, dakpon pud ta kay wala pa marehistro.  Asa man diay ang mag-una, rehistro o testing? Makalibog gyud!

Mabisibisan na ang tutonlan

Gihangop sa mga mahiligon moinom og bino ug ubang mga ilimnong makahubog ang bag-ong Executive Order nga giluwatan sa Cebu City government nga naglibkas na sa liquor ban sa mga publkong lugar ug nagtugot na sa pagbaligya ug pag-inom basta sulod lang sa kaugalingong panimalay.  Human sa 42 ka adlaw nga pag-puasa ug ka-uhaw, mabisibisan na gayud ang tutonlan sa mga palainom.  Kon mag-inom na kini sila, unsa kaha ang lagda nga mopatigbabaw: “Drink moderately” o “One for the Road”?  Na hala, Kan Pai!

Daghang “ufo” atol sa COVID

Mipagawas ang Pentagon og tulo ka declassified nga mga video nga nagpakita sa enkwentro tali sa mga pilot sa US Navy ug sa gituohan nga mga Unidentified Flying Objects (UFO).  Ang pagpagawas sa maong mga video nagpamatuod nga adunay mga laing binuhat sa kawalaan gawas kanato.  Dinhi sa ato, ni’ng panahon sa COVID, daghan pud unya ang mga lokal opisyal ang makasinati og “UFO” kon ipatuman na ang pagpamantala sa mga listahan sa nakadawat sa  hinabang. Ang “UFO” nga masinati mao ang “Unsettled Financial Obligations”.  Hala no!

Tiyan kutoy, buhok hamloy

Segun sa balita, adunay babaye nga nadakpan sa curfew tungod kay nagabhian sa pagpauli kay gikan man siya nagpa-rebond sa iyang buhok.  Nasayran usab nga ang kwarta nga iyang gibayad pagparebond, mao ang hinabang nga iyang nadawat gikan sa SAP.  Mao na’y giingon nga “Bahala’g tiyan magkutoy, basta buhok tul-id, sinaw ug hamloy”.  Pagkatoytoy!

Lahi ang meaning sa “SAP”

Mimando na ang DILG ngadto sa mga kagamhanang lokal nga kinahanglan makompleto na pagpanghatag karong Abril 30 ang emergency subsidy ngadto sa mga gitumbok nga mga beneficiary sa Social Amelioration Program (SAP).  Gihimo ang maong kamandoan tungod sa balita nga daghan pa ang wala makadawat sa maong hinabang.  Angay gayod nga tumanon sa mga lokal nga opisyal ang maong kamandoan aron dili mausab ang kahulogan sa SAP.  Inay Social Amelioration Program, basin mahimo hinoon kining “Sobra’ng Atrasawo ang Pagtabang”.  Madahaan!