Pagbagulbol ni Rama

Bisan og padayong gipatuman sa atong kagamhanan ang Enhanced Community Quarantine (ECQ), daghan usab ang padayon sa ilegal nila nga mga buhat, sama sa pagpamaligya og illegal drugs.

Tungod niini, way undang nga matag adlaw dunay mga dinakpan nga dad-on diha sa atong mga bilanggoan aron prisohon samtang magpaabot sa adlaw nga husayon sa korte ang ilang mga kaso.

Ako maoy una nga mipadangat ug pasidaan kaniadtong miaging semana, nga moabot ang adlaw nga masudlan og Coronavirus Disease ang atong mga bilanggoan.

Tuod, wa ko masayop, kay paglabay sa pipila ka adlaw gipahibawo na sa Department of Health (DOH) nga adunay mga piniriso nga natakboyan na og Covid19, ug gani usa na ang namatay.

* * *

Duna ko’y sugyot, kadtong mga bag-ong “entrada” nga ipasulod diha sa bilanggoan, dili dayon iipon sa kinabag-ang mga piniriso. Adto usa sila ibutang sa “holding center” aron panid-an sulod sa duha ka semana kon wa ba sila matakboyi og Covid-19.

Kon paglabay sa duha ka semana ug wa gyuy timailhan nga sila natakboyan sa mananakod nga sakit, anha pa nga higayona nga sila ipasulod ipon sa ubang mga piniriso.

Unya, kadtong mga binilanggo nga ipagawas sa bilanggoan, sama sa pag-adto sa mga hukmanan, bantayan gyud pag-ayo nga dili sila maduolan bisan og ila pa nga mga kabanay.

Kon mahimo ni sa mga tinugyanan sa bilanggoan, layo ra ang posibilidad nga matakboyan sa virus ang mga piniriso. Unsay inyong ikasulti niini mga higala ko sa Bureau of Jail Management and Penology.

* * *

Klaro na kaayo ang pagpanaway ni Cebu City Vice Mayor Michael Rama ngadto sa administrasyon ni Mayor Edgar Labella kay gihulagway niya nga dunay mga sayop nga pamaagi niini pag-alkontra sa Covid-19.

Ang akong ikasulti niini mao nga ikaw man ang bise mayor, sir, ayaw kataha ug sultihi si Mayor Labella kon tan-aw nimo may nindot ka nga hunahuna ug mga pamaagi.

Kon manaway gani ta, kinahanglang duna kita’y ikapresentar nga mga mas bentaha nga pamaagi. Pareho gud niining akong gihimo nga mihatag ko og sugyot kon unsaon nga malikayan ang dugang pagkuyanap sa mga Covid-19 cases diha sa mga bilanggoan.

Masabot man gud karon nga may mga panagsungi na tali kaninyo ni Mayor Labella nga kauban man unta mo sa grupo. Matud pa bitaw nimo kaniadto nga “pag mayor usa mo.” Kay mayor na man karon si Labella, siya na ang matuman ug masunod, apan wa ka did-i sa paghatag og mga maayong sugyot unsaon sa pagpalambo ang siyudad.

Matud pa bitaw sa panultihon, “The boss is always right, and if the boss is wrong, see rule No. 1.”