Martial law alang sa mga gahi’g ulo
Mipadayag og pag-uyon ang mga mayor sa dakbayan sa Sugbo, Mandaue ug Lapu-Lapu sa gilaraw sa nasudnong kagamhanan nga pagimponer sa susama’g Martial Law nga pamaagi pagpatuman sa lagda sa ECQ taliwa sa daghang mga kalapasan niini. Kon madayon kini, pulis ug sundalo na unya ang atong makita sa mga kadalanan aron modisiplina kanatong tanan. Kon mapakyas gayod ang ECQ, modangop na lang gyud kita sa Martial Law. Mao kini tukma nga tambal sa mga gahi og ulo ug mga walay disiplina nga mga tawo.
Laag pa more!
Plasma sa dugo, dili plasma tv
Gikataho nga mi-donate si Senator Juan Miguel Zubiri sa iyang plasma ngadto sa Philippine General Hospital sa tuyo nga matabangan ang uban nga mga biktima sa COVID. Nahibaw-an nga nataptan si Senator Zubiri sa corona virus apan naayo siya nga walay komplikasyon. Atong klarohon nga plasma sa dugo ang gi-donate ni Senator Zubiri og dili Plasma TV nga giingon nga i-donate usab unta sa ubang mga may malumo nga kasing-kasing. Tambal ang kinahanglanon sa pasyente, dili Plasma TV.
Pagkatoytoy!
Mapriso pag-usab tungod sa COVID
Tungod sa nahitabo karon sa Cebu City Jail diin adunay gikataho nga mga piniriso nga nataptan na usab sa coronavirus, miawhag ang Department of Health ngadto sa Bureau of Jail Management and Penology nga ibalhin ug ilain ang mga priso nga nataptan sa COVID. Buot ipasabot nga ihikling sa lahi nga lugar ang maong mga masakiton. Human mapriso kay nakalapas sa balaod, laing pagkabilanggo na usab ang ipahamtang kanila tungod sa COVID. Lampingasan usahay ang kahigayonan.
Saoonz!
Bakuna, dili bahalina
Mipadayag ang Malacañang nga mohatag ang Presidente ug P10 milyones nga ganti alang niadtong makadiskubre sa bakuna batok sa COVID. Mahimong ma-adunahan ang binuhat nga makadiskobre sa maong tambal. Na hala, sugdi na ninyo og pabukal ang mga dahon nga makutlo ninyo diha sa inyong palibot apan seguroha lang nga dili mo malanag sa inyong gipili nga mga sambog. Basin baya nagtoo mo nga parehas ra kana sa pagtimpla sa Bahalina ug Pepsi. Madahaan!
Immune na sa kagaw
Buot ni Konsehal Dizon nga mopasar og resolusyon nga mag-awhag sa Department of Public Services (DPS) sa paghatag og tukma nga personal protective equipment (PPE) sa mga basurero sa dakbayan aron masiguro nga luwas ang ilang kahimtang ug panglawas sa pagtuman nila sa ilang gimbuhaton. Dili na bag-o ang maong ideya, apan hangtud karon wala gihapon mahatagi og katumanan. Sa ilang pagkatandang sa tanang matang sa hugaw, na-immune na lang intawon ang atong mga basurero sa kagaw. Faeetz!
- Latest