Faith mask

Sa misa sa telebisyon gahapong adlawa ni Fr. Jerry Orbos, duna koy nakutlo nga mensahe nga angayan usab masayran natong tanan kalabot sa nasinati karon nga krisi sa coronavirus o COVID-19.

Dili lang facemask kon dili mas mahinungdanon usab ang atong faith mask aron kita makasugakod niining pagsuway nga atong gisagubang.

Labaw sa tanan nga atong himoon mao ang pagpalig-on sa atong paglaum ug pagtoo nga makalingkawas sa kagaw pinaagi pagsunod sa gipatuman nga lagda sa atong kagamhanan.

Daghan na kaayo ang nangreklamo tungod sa epekto sa enhanced community quarantine nga dugay kuno nalibkas, apan taliwala sa kagustohan nga makalingkawas sa kalisdanan ang kagahi sa ulo sa paglapas sa COVID-19 protocol.

Sama sa panaw kaniadto sa panon ni Moses gikan sa Ehipto padung sa yuta sa saad nga milungtad og 40 ka tuig nga unta pwed ra makaabot sila sa daling panahon.

Nalangan kadto tungod sa daghan nga mga badlonong sa panon nga susama sa nahitabo karon nga imbis dali kining masulbad apan malangan na hinoon kay dili man mopatoo ang mga tawo.

Ania kita karon sa war zone sa nahitabong World War III nga giatubang nato ang kontra dili makita, halos tanang nasod sa kalibutan gisakop na sa kaaway.

Hangtod karon wala pa makakaplag og armas nga ikaalkontra sa kagaw bisan ang mga super power nga nasod.

Luyo niining tanan mahuna huna nato nganong nahitabo man kini? nganong gitugot man sa Ginoo? yano lang ang tubag gipaubos kita sa purification process niining panahona.

Tungod sa kahugaw na sa mga tawo nga Iyang nilalang gikinahanglan niyang limpyohan o i-purify aron mapuslan sa mas maayo nga katuyoan sa kalibotan.

Makita nato nga inanay nang dunay resulta sa purification process sanglit nibalik og luhod nga inubanan sa paghinulsol ang mga tawo nga mibalik na sa Ginoo.

Apan nasayod ang Ginoo malimtanon ang mga tawo nga gikinahanglan pahinumduman gyud sa dili malimtan nga kasinatian aron mamahimong takos sa kaluwasan nga iyang ihatag.

Daghan nangandoy nga mabalik sa normal ang atong kahimtang nga dili angay mahitabo tungod kay kon mobalik kita sa naandan nga normalcy balik usab ang mga tawo sa mga kasaypanan.

Angayan nga ang bag-ong normal mao nay atong ipadayon, ang pagka Diosnon, pagkamaampoon, maampingon ug magpakabana sa isig ka tawo maoy atong ipabilin.

Dili nato ipatigbabaw ang kalagot ug kasuko kon dili ipatigbabaw nato ang kaaghop sa kasing kasing kay matod ni Fr. Orbos “The Goodness of your HEART is the best weapon” sa pagsumpo sa atong kontra.

Isul-ob nato ang atong faith mask aron dili matarog ang atong pagtuo ug paglaum nga moabot ang panahon nga hingpit na nga makita sa matag usa kanato ang imahen sa Dios kay dinhi makompleto ang purification process sa atong pagkatawo nga hinulma sa imahen sa atong Labawng Makagagahum.