Libelous nga post sa Facebook

Dear Atty. Divine,

Duna koy pangutana labot sa libelous statements  nga gi-post sa Facebook wall sa akong amiga batok nako. Tungod sa maong posts nauwawan ko sa among lugar kay nagtuo ang among mga silingan nga tinuod ang iyang posts nga nagtrabaho ko sauna sa usa ka bar.

Gusto nako nga mapasakaan og kaso ang nag post niini aron siya mahatagan og leksyon kay klaro kaayo nga pagdaut sa akong dungog ang iyang katuyuan. Ang akong pangutana unsay una nako nga buhaton? Daghang salamat.

Jessica

* * *

Dear Jessica,

Ang una nimong buhaton mao ang pag screen shot sa iyang mga libelous nga gi post sa Facebook batok nimo.

Apil sa imong i-screen shot mao ang mga comments sa iyang posts kay usa ni sa makaprobar nga nabasa sa laing tawo ang iyang posts ug nauwawan ka. Kining maong mga screen shots apil sa imong mga ebidensya sa imo unyang pagpasaka og Online Libel busa dapat nimong i-print ang imong nakuha nga mga screen shots.

Apan tungod sa sitwasyon nato karon nga gipailawom sa ECQ ang kadaghanan sa mga dapit tungod sa Covid-19 mas maayo nga imo kining i-file ini’g libkas na unya sa ECQ. Mamahimo ka nga mokuha og imong private lawyer nga maoy mo-prepare unya sa imong ipasaka nga kaso. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email  sa [email protected] ug atong tubagon ang inyong pangutana pinaagi sa akong column matag Miyerkules, Sabado ug Domingo.