Delikado kon ang kabus maigo sa COVID

Sa una moingon nga pangdatu lang kuno ang Coronavirus Disease o COVID-19 kay halos mga adunahan ug mga gamhanan man ang nangaigo sa balatian.

Apan unsa naman karon nga naa may mga kabus nga nangaigo na sa COVID ug ang dakbayan sa Sugbo maoy kinadaghanan og kaso sa Central Visayas.

Sa sitio Zapatera baranggay Luz lang daan 29 ka mga tawo ang nataptan sa maong kagaw kinsa pulos intawon mga probre. Sa ubang mga barangay sa syudad mga datu ang mga nangaigo kaniadto apan wala makakuyanap sama sa Talamban kay na contain man dayon ang virus.

Nindot ug kongkreto ang ilang mga pinoy-anan ug exclusive pa gyud nga dili makagawas ang virus, na admit usab sila sa mga mahalon nga tambalanan.

Dali usab kaayo silang nasayran nga positibo kay naa may kwarta nga magamit sa pagpa-test sa coronavirus.

Tinuod nga walay gipili ang sakit madatu man o mapobre apan makita nato karon ang kalainan kon ang mga pobre na ang mataptan. Kahinumduman sa pagsugod pa lang niining COVID-19 sa atong lokalidad kadtong mga Instsik nga nagpositibo, giadmit dayon sila sa tambalanan hasta ang iyang partner nga lalaki kinsa sa sinugdanan asymptomatic apan mas nauna pa sa pagkamatay kay sa principal patient.

Gi-cremate dayon ang lawas kay protocol lagi basta COVID-related nga kaso, ang contact tracing ug ubang mga lakang ang gihimo aron masayran kinsa ang nangakauban sa unang mga COVID-positive.

Karo sa sitwasyon sa Bario Luz diin unang nasuta nga naay positivo nga tulo ka residente, ang usa lang ang na admit sa hospital ug ang duha gi-home quarantine lang kay asymptomatic ra nunot sa lagda sa DOH.

Nag-home quarantine lang sila, pero ang mga balay dingding lang ang nag uwang sa ilang silingan nga madungog ra gani ang ilang hagok kay hilabihan ka sikit ang mga balay.

Miresulta nga nanakod sa laing lima ug ang lima nanakod og laing 21 ka mga tawo tungod kay mikuyanap naman ang kagaw sa dapit.

Ok ra man unta nga i-home quarantine ang mga asymptomatic kon nindot kaayo ang ilang balay kay dili na makatakod. Pero kon ang balay dunay mga gawang nga manglusot ra ang mga gininhawa sa mga tawo delikado kaayo.

Kon ang datu mataptan aw hilom ra, masayran man gani pero dugay pa pero kon ang mga kabus na ang maigo morag bomba kay seguradong mobuto og mamisik sa ilang mga silingan. Unta maapsan pa sa kagamhanan ang mga virus nga nikuyanap karon aron dili na makaadto pa sa ubang mga dapit sa syudad.