Gi-ulug-ulogan ba lang ang LGUs?
Bisan nakasugod na ang pag-apud-apod sa binuwan nga hinabang nga P5,000 ngadto sa P8,000 sa matag pamilya nga nawad-an og panginabuhi tungod sa lockdown sa tibuok Luzon ug sa dakong bahin sa Kabisay-an ug Mindanao, may lokal nga mga opisyal nga niawhag sa Department of Social Welfare and Development (DSWD) nga mao na lay molista sa labing kabos nga mga pamilya nga hatagan sa hinabang.
Kay mga politiko man ang mga nagduma sa kalungsoran ug mga dakbayan, ug kay di man tanang kabos nga pamilya ang mahatagan sa kuwarta, mahimo silang kapasanginlan nga namolitika sa pagpili sa labing tabanganan nga mga pamilya--nga gipalabi ang ilang mga alyado ug gilaktawan ang ilang mga kaatbang.
* * *
Lisod sab sabton ang duha ka hugna sa pagpanglista sa tabanganan nga mga pamilya: Una, ang lokal nga mga opisyal mohimo sa ilang kaugalingong lista pinasikad sa social amelioration cards (SAC) nga ipang-apud-apod sa kabalayan; ug sublion sa DSWD ang listahan nga isumiter sa local government units (LGUs).
Sa ato pa, ang DSWD maoy magbuot pila ra sa nalista sa LGUs ang makadawat sa aktuwal nga hinabang. Maong nabalaka ang lokal nga mga opisyal nga mas masuko ang mga nahatagan nila og SAC apan di mahatagan kay mora na man hinuon sila og gipalaom sa wa.
* * *
Gawas pa, wa kinahanglana ang listahan sa LGUs kay ang DSWD duna nay komprehensibong lista sa tanang kabos nga mga pamilya sa tibuok nasud pinaagi sa iyang programang “Listahanan,” ang National Household Targeting System for Poverty Reduction (NHTS-PR), kansang tumong mao ang pag-ila sa labing kabos nga mga pamilya nga angayng hatagan og hinabang sa nagkalainlaing mga buhatan sa kagamhanan.
Mas makiangayon ang “Listahanan” kay gihulagway ni sa DSWD nga information management system nga niggamit sa geographic targeting, household assessment ug validation.Sa laktod, kon napatuman lang og tarung, di malawgaw sa mga pamolitika.
* * *
Ug napakita sa DSWD ang kapaspas sa hinabang kon gamiton ang iyang kaugalingong listahan. Ang DSWD naka-apud-apod dayon niadtong weekend sa P16.3 bilyones nga hinabang ngadto sa 3.6 milyones ka pamilya nga nalista sa ilang Pantawid Pamilyang Pilipino Program (4Ps).
Ulug-ulog ba lang diay ang pagpaapil sa LGUs?
- Latest
